Khaw pakuaah sikul leh pisa khâr zui zel Lumpsum M/S leh H/S-te khâr dawn hnai?

Mizorama lump sum grant-in-aid higher secondary school (HSS) pakuate adhoc grant-in-aid dinhmuna hlankai phût vangin lump sum HSS awmna khaw pakua­ah sikul leh sorkar pisa zawng zawng chu khar chhunzawm zel a ni. Hetih lai hian, lump sum grant-in-aid high school leh middle school-te pawh adhoc aided-a dah phût vangin khâr turin ruahmanna kalpui mek a ni bawk.

Tarlan tawh ṭhin angin, Mizoram Government Lumpsum Grant-in-aid Higher Secondary School Association (MIGLAHSSA), khaw pakuaa School Managing Board leh Joint Students Union-te chuan lumpsum HSS-te adhoc aided-a dah phût vangin HSS pakuate chu June 18, 2018 aṭangin an khâr ṭan a, holiday tel loin ni 30 vel chhung khâr a ni tawh.

July 26 aṭangin lump­sum HSS pakuate mai bakah, an awmna khuaa sikul leh sorkar pisa zawng zawng an khar ṭan leh a, kawngpui an dang bawk. Kawngpui dan hi chu July 30-ah an titawp a, sikul leh pisa erawh nimin thleng khan an la khâr chhunzawm zel a ni.

Hetih lai hian, Mizo­ram Government Aided School Association (MIGASA) pawhin lump­sum aided high school leh middle school-te pawh adhoc grant-inaid dinhmuna dah an phût ve mek a; hemi chungchangah hian tun hnaiah Aizawlah press conference an neih tawh bakah, press release-te pawh an siam tawh ṭhin.

MIGASA hruaitute sawi danin, kumina MIGASA General Assem­bly-ah, "July 2018 chhung sorkar ngaihchàn ni se, thu lawmawm kan dawn loh chuan 'No Teaching Day' hman leh a ṭul chuan sikul khâr chhunzawm ni se," tiin an rêl a ni. An hun tiam, July 2018 chhung tih chu nimin khan a tàwp.

Vanglaini zawhna chhangin MIGASA ge­ne­ral secretary R Lal­lawmsanga chuan, an thil phûtah sorkar aṭangin an beisei ang thu lawmawm an hmuh loh thu a sawi a; an hmalak zui dan tur chungchangah, "Tunah chuan exam chawlh lai a ni a, August 7-ah sikul luh leh tur a ni. Sikul luh leh ṭan hunah kan Assembly thurel angin, 'No Teaching Day' kan hmang mai turah ka ngai," a ti.

MIGASA president C Lalngaihzuala pawhin, an kal zel dan turah Assembly thurel a awm tawh thu a sawi a; chutih rualin, sikul chawlh lai a nih rih avangin an hmalak dan tur sawiho turin tun kar tawp lamah inhmuh khawm an tum thu a sawi.

MIGASA hi lumpsum aided school zingah H/S leh M/S-te intêl khawmna a ni. An hruaitute sawi danin, MIGASA-ah hian lumpsum H/S leh M/S 62 an awm mek a; chu'ng zingah chuan public private bakah, kohhran sikulte leh commercial private school-te pawh an tel a ni.