KHAWTHLIR

Draft roll tlangzarh
Nimin khan Mizoram hmun hrang hrangah Draft Electoral Roll tlangzarh a ni a, mipuite en theih turin târ chhuah nghal a ni. Electoral roll aṭanga paih, thun thar, siamṭhat ngai leh insawn duhte tan dilna July 31 aṭanga August 21, 2018 chhungin booth level officer (BLO)-te hnenah thehluh theih a ni. Dilnate chu August 21 aṭanga September 20, 2018 chhungin ERO/AERO ten an endik ang a, chumi hnuah hming thun, paih leh siamṭhat ngaite chu DC pisaa Election branch-in a thliar leh dawn a ni.

Sports meet hawng
Mizoram sorkara department hrang hrangte intihsiakna, Annual Mizoram Civil Services Sports Meet ṭum 31-na chu nimin khan R Dengṭhuama Indoor Stadium-ah ṭan a ni a, Sports & Youth Services secretary Lalthangpuia Sailo-in a hawng. Sports Meet hian ni li chhung a awh dawn a; badminton, table tennis, chess, carrom, shooting, chinese checker leh tennis-ah an intihsiak dawn a ni.

NDA coaching class buatsaih
46th. Assam Rifles chuan July 30, Thawhṭanni khan Students Outreach Porgramme an kalpui mek hnuaiah National Defence Academy (NDA) Preparatory Coaching Class an buatsaih. Coaching class hi phase hniha kalpui a ni a, Aizawl khawpuia sikul hrang hrang aṭanga zirlai 15 thlante tana buatsaih a ni.

New Chalrang thlang
Champhai district huam chhunga Mipui Mamawh Inṭawm Ruahmanna (MiMIR) hnuaia intihsiakna chu a hmawr bawk fel a ni a, New Chalrang khaw project siam NCR Organic Pineapple Processing Plant tih chu pakhatna atana thlan a ni. New Chalrang hian an project tihhlawhtlinna atan hian cheng vbc. 1 an dawng ang.

Zu sakna tichhia
Aizawla Excise & Narcotic enforcement-te chuan nimin khan Phunchawng leh a chhehvel ramhnuaiah dan loa zu sakna hmunte an dap a, zu sakna hmun eng emaw zata an hmuhte chu an tichhia. Rakzu litre 225, zu bilh lai ṭin 720 leh zu sakna bêl 25 an man bawk.