Bru hruai kîr turin sorkar a inpeih MBDPF-te'n kîr duh an awm ring lo

Mizoram sorkar chu Tripura relief camp-a Mizoram Bru-te Mizorama hruai kîr turin a inpeih thawkhat tawh. Hetih lai hian, Mizoram Bru Displaced People Forum (MBDPF) hruaitute chuan, tun dinhmunah chuan Mizorama lêt duh an awm an rin loh thu an sawi.

Vanglaini palai zawhna chhangin Home department additional secretary Lalbiakzama chuan, Bru-te hruai kîr turin ngawrh taka an inbuatsaih thu a sawi a, "Kan inpeih thawkhat tawh a, hruai kîrna tur motor pawh kan be fel tawh. Kan sum neih ang ang chu hruai kîr hna thawktu tur Kolasib, Lunglei leh Mamit DC-te hnenah kan hlan tawh a ni," a ti.

Tripura relief camp-a Bru-te thil phût zinga pakhat, Mizorama an lêt huna a hlawma dah chu Mizoram sorkarin an remtih loh thu Lalbiakzama chuan a sawi.

Hetih lai hian, MBDPF chairman A Sawibunga chuan, tun dinhmunah chuan relief camp-a Bru zingah Mizorama kîr duh an awm a rin loh thu Vanglaini a hrilh a, "Thil phût hrang hrang an nei a, hengte hi tihhlawhtlin a nih loh chuan kîr duh an awmin kan ring lo. Boruak thlir thiam a har khawp mai," a ti.

A Sawibunga chuan, Bru lâk lêt hna thawh a nih hmain inbiakna awm se ṭha an tih thu sawiin, "Sorkar laipui, Mizoram sorkar leh Tripura sorkar bakah MBDPF-te inbia ila, harsatna awmte sawiho ila kawngro a su mai thei," a ti a; Bru-te thil phût chungchangah sorkar laipuiin thu leh hla an la neih loh thu a sawi.

Relief camp-ah thil tihfel tur tam tak a awm thu sawiin MBDPF Chairman chuan, "Heng chinfel leh tihfel ṭul hrang hrangte hi kan la tifel hman lo," a ti.

Ruahmanna siam dan chuan, Tripura relief camp-a Bru-te Mizorama lak lêt hna hi August 14, 2018-ah ṭan tur a ni a, September 10, 2018-ah zawh vek tur a ni.

Tarlan tawh angin, Ministry of Home Affairs, Mizoram sor­kar, Tripura sorkar leh MBDPF-te'n relief camp-a awm Bru-te Mizorama hruai kîrna tura July 2, 2018-a New Delhi-ah inremna, Draft Agreement an ziaha an lungawi loh avangin MBDPF chairman A Sawibung chu July 16 khan agreement aṭangin a inhnûkdâwk.

Draft Agreement-a lungawi lote chuan Mizorama an lêt huna an awmna tur hmun ruatah chhungkaw 500 vel a huhoa awm te, anmahni vengtu tur para military force dah te, an eizawnna tur ram chhungkaw pakhat tan hectare 5 ṭheuh pek te, anmahni chhawmdawlna tura chhungkaw tin tan Rs. 4,00,000 pek tur chu kum thum hnua pek chhuah tura ti loa bank-a pawisa dah luh dan pangngaia dah te, Bru culture leh sakhuate humhim a nih a, ei leh bara hma an sawn theih nan Development Council dinte an phût a ni.

Hetih lai hian, relief camp aṭanga Mizorama lêt tawh Bru-te chuan hruai kîr turte dawn ang dawn ve an phût a; Bru lak let hna ṭan hun, August 14, 2018 hmaa pek an nih loh chuan hruai kîr hna hi boycott an tum a ni.