MRPS Act zirhona hun buatsaih

Mizoram sorkar hnuaia mipui hnena sorkarin service a pek ṭhin hunbi neia pek chhuah ngei ngeina dan, Mizoram Right to Public Services Act, 2015 chungchang zirhona leh inhrilhfiahna hun nimin khan Administrative Training Institute (ATI) auditorium-ah neih a ni a, Health secretary Lalrinliana Fanai-in a hawng.

Lalrinliana Fanai chuan, December 1, 2015-ah Mizoram Right to Public Services (MRPS) Act, 2015 hman ṭan a nih thu sawiin, "He danin a tum ber chu, sorkar service pek chhuah theihte hun tiam chhunga a diltu hnena pek a ni. Tun dinhmunah sorkar department paruk hnuaiah service 46 a awm a, service dah belh zel tum a ni," a ti a; MRPS Act chu mipuite hnena service pek chhuah tur ṭul loa tihkhawtlai ṭhin venna a nih thu a sawi.

MRPS Act hi state 18-ah hman mek a nih thu sawiin Lalrinliana Fanai chuan, "A hmangtu mipuite'n an hman ṭangkai ang zelin he dan hi a hlu zual dawn. Tun dinhmunah chuan mipuite'n kan hman ṭangkai tur angin kan la hmang lo a, hei vang hian Mizoram pumah inhrilhriatna beihpui neih a ni dawn a, district, sub-division leh RD block-ah August thla chhungin kalpui a ni ang," a ti.

MRPS Act hian Food, Civil Supplies & Consumer Affairs department, Rural Development, Taxation, Public Health Engi­neering, Social Welfare leh Finance department-te a huam a ni.

A huam chin department-ah hian service 46 a awm a; service ṭhenkhat chu ration card pek chhuah te, MGNREGA hnuaia job card sem chhuah te, driving licence siam te, learner’s licence pek chhuah te, tui supply connection te, adoption certificate siamte an ni. Form hranpa a nei lo a, department-te'n dilna an pawm ṭhin pangngai anga dil tur a ni.