Hri thar darh mah se sorkarin Inkhàrkhip tumna a nei rih lo - Health Minister

Health & Family Welfare minister Dr R Lalthangliana chuan, Covid-19 hri thar darh mek mah se, tun dinhmunah chuan Mizoram sorkarin inkhàrkhip leh inkhap zawnga kal tumna a neih rih loh thu a sawi a, "Sorkarin inkaihhruaina a siamte ngai pawimawh turin mi tin beisei an ni," a ti.

Nimina MJA hruaitute kum thar thingpui a inpuinaah Health Minister chuan, Mizoram chu Covid-19 in tibuai mah se, India ram leh a bikin hmarchhak state-ah chuan a tuar na lo páwl leh hripui thihpui tlemna páwl a nih thu a sawi a, "Hei hi kan ṭan rualna vang a ni. Omicron hri thar darh leh hi Delta Variant ai pawha a lêt thum leh a chanve vela inkai darh awlah mithiamte'n an ngai a ni," tiin, hri tharin India ram khawpui eng emaw zat a tibuai a, inkhàrkhip zawnga kal an awm leh mek thu a sawi.

Dr R Lalthangliana chuan, Mizoramah chuan Krismas leh kum thar vuakvetah punkhawm inkhap hleih theih a nih loh thu sawiin, "Biak-ina inkhawm, zai leh ruaiṭheh chungchangah pawh sorkar chuan kohhran tin rèl danah a dah mai a ni. Sorkar ang chuan 'Ti suh u' tia inkhap kan tum lo a, medical lama mithiamte'n kan zavaia kan zawm tur SOP an siamte ngai pawimawh tur erawh chuan chiang takin kan inhrilh," a ti.

Health Minister chuan, sorkarin invenna lam a ngai pawimawh nia sawiin, "Kum 15-18 inkar tan Covid vaccine pek ṭan mek a ni. January 3 khan Mizoramah pawh vaccine pek khuhhawnna Aizawlah hman a ni a, district tina district immunization officer-te'n an huam chhunga pek dan tur an ruahman dawn. Mizorama pek zat tur chhût mek a ni chungin, mi nuai 1 aṭanga nuai 1.5 inkar vel awm nia hriat a ni. Kum 2007 leh a hma lama piangte chu vaccine la vek turin ka ngen a ni," a ti.

MJA president Zonunsanga Khiangte chuan, Dr R Lalthangliana chu journalist-te ngaihven em em ṭhintu a nih thu sawiin, kum thar puala MJA hruaitute a kâwm chu lawmawm a tih thu a sawi a; hripui léng donaah MJA-in a theih ang tâwka a thlàwp tawh angin, a ṭul anga thlàwp zel an inhuam thu a sawi bawk.