Aizawl Bawrhsap Pisapui Kan chhan chhui mek a ni

December 17, 2021 zing dar 3:15 vela Aizawl Bawrhsap Pisapui kan chhan chhui tura din magisterial inquiry chuan pisa kan chhan a la chhui zo lo a, a chhui mek.

Bawrhsap Pisapui kan chhan chhui tur hian Aizawl Municipal Corporation joint municipal commissioner H Lalhmingthanga ruat a ni a, January 1, 2022-ah report thehlut tura tih a ni. Vanglaini palai zawhna chhangin H Lalhmingthanga chuan, Aizawl DC pisa kan chhan a la chhui zawh loh thu a sawi a, "Ngawrh takin a chhui hna kalpui mek a ni," a ti.

H Lalhmingthanga chuan, sorkarah ni 10 pek belh tura a ngen thu sawiin, "Chhui tura ruat ka nih hnuah pisa kal a mumal lo chho nghal a, duh angin hma a lak chak theih loh. Chuvangin, ni 10 chhung hun ka dilh belh a ni," a ti a, hun an pek belh chhungin report thehluh hman ngei a inbeisei thu a sawi.

Hun a neih tam loh avangin ṭan mar pát a ngaih thu sawiin H Lalhmingthanga chuan, "Thu zawhfiah ngaite pawh ko loin, an awmna hmunah ka kal chilh. A nih loh chuan report ka thehluh hman loh palh ka hlau a ni," a ti.

Police hotute sawi danin, Aizawl DC pisa hi zing dar 3:15 velah Election Branch aṭangin a kâng ṭan a, zing dar 4:10-ah Fire & Emergency Service hriattir chauh a ni.

Bawrhsap Pisapuia document hluite chu digitisation kalpui mekah record leh lehkha hlui zual, DC Archive Room-a dah zinga 95% vel chu digitise hman a ni a; mahse, tun hnaia record leh lehkha pawimawhte chu a kâng ral vek thung.

Aizawl Bawrhsap Pisapui hi kum 1890-ah luah ṭan a ni a, kum 131-a upa a ni. Kum 1870-a hawn Tlabung Post Office dawta Mizorama pisa awm hmasa ber a ni.