Aizawl Sahuan tlawhtu an ṭhahnem

Aizawl Zoological Park (Aizawl Sahuan) chu Covid-19 léng vanga hun eng emaw chen khàr a nih hnuah October 5, 2021 aṭangin mipui tlawh theiha hawn leh a ni a, December 30, 2021 thleng khan mi 19,739-in an tlawh hman.

Sahuan enkawltute chuan Vanglaini palai zawhna chhangin, kum dang aia mipuiin an tlawh nasat thu an sawi a, "Tlawhtu an ṭhathnem cháng phei chuan lirthei dahnain min daih lo a, parking area kan neiha leng lote chu páwn lam kawngpui dungah thui tak takin an ding tlar ṭhin," an ti a, mipuiin sahuan an ngaihlu chu lawmawm an tih thu an sawi.

Ruihhlo leh a kaihhnawihte ken luh khap a nih thu sawiin sahuan enkawltute chuan, "An bag-te kan lo endik ṭhin a, ruihhlo kengte chu ken phal loh a nih thu hrilhin gate-ah kan dahtir a, an chhuah dawnah kan pe leh mai. Mahse, warning pek tawh hnua keng lut kan mante chu kan paihsak ṭhin," an ti.

Aizawl Zoological Park hotute sawi danin, sahuan hi Covid-19 lêng vanga inkhàrkhip (lockdown) puan a nih avangin kum 2020 khan hawn mumal hman a ni lo a; nikuma sakei pahnih dah tura ruahman tawh chu a dahna hmun tur tihchangtlun mek a nih avangin February 2022-ah dah theih beisei a ni.

Aizawl Sahuan hi hripui léng vanga hun eng emaw chen khàr a nih hnua October 5, 2021-ah hawn leh ṭan a ni a, October 5 aṭanga December 30, 2021 thleng khan mi 19,739-in an tlawh hman. Chutih laiin, kum 2019 (April-December) chhung khan mi 21,567-in an tlawh a ni.

Sahuan hi Thawhṭanni tih loh ni dang zawngah hawn ṭhin a ni a, kumin aṭang chuan Pathianni-ah khâr ṭhin a ni tawh dawn a, Thawhṭanni aṭanga Inrinni thleng hawn ṭhin a ni ang.