Covid-19: Mizoramah kum 2021 chhungin Positive 1,37,449; thi 537; chhuak 1,35,175

Kum 2021 chhung khan Mizoramah swab sample endik 13,26,044 aṭangin Covid-19 vei mi 1,37,449 hmuh chhuah a ni a, hripui vei dam tawh mi 1,35,175 chhuahtir niin, hripui vangin mi 537 an thi.

Nikum chhunga Covid-19 positive hmuh zat 1,37,449 chu sample endik aṭangin 10.19% a ni a, mitthi zat 537 chu hripui vei hmuh zat aṭangin 0.39% a ni.

Nikum September thla kha sample endik zat (2,31,281) leh Covid-19 positive zat (34,831) an tam ber thla a ni a; October thla kha hripui vei dam tawh chhuahtir zat (36,508) leh hripui vanga thi zat (122) an tam ber thla a ni thung.

December 2021 chhung bikah Covid-19 vei mi 6,490 hmuh chhuah a ni a, hripui vei dam tawh mi 8,456 chhuahtir niin, mi 47 an thi a ni. IDSP tarlan danin, December 2021 chhungin Mizoramah swab sample 75,161 endik aṭanga Covid-19 positive hmuh chhuah mi 6,490 chu 8.63% a ni a, November 2021 chhunga hmuh chhuah zat 13,651 aiin 7,161-in a tlem zawk.

November thla chhung vekin hripui vei dam tawh mi 8,456 chhuahtir an ni a, hripui vei hmuh chhuah zat aiin chhuahtir zat mi 1,966-in an tam zawk. Covid-19 vanga thi mi 47 an awm a, June, July, August, September, October leh November thlaahte thi zat a tam zawk a ni.

December 2021 chhunga Covid-19 positive hmuh chhuah tam ber ní chu ni 6 kha a ni a, mi 330 hmuh chhuah a ni. Hripui vanga thi an tam ber ní chu ni 12 kha a ni a, mi paruk an thi a; mitthi awm loh ni ni ruk a awm.