KHAWTHLIR

Carbon trading CM hoin sawi
Chief minister Zoramthanga chu nimin khan a pisaah EKI Energy Services Ltd. hotute'n an kâwm a; carbon trading-ah Mizoramin theihna nasa tak a neih thu leh state tan sum hnár ṭha tak a nih theih dante an sawiho. CM hi State Planning Board vice chairman H Rammawi, adviser to CM C Lalramzauva, adviser to CM (technical) Lalsawmvela leh OSD to CM Rosangzuala ten an ṭawiawm a ni. Sorkar thuchhuah tarlan danin, EKI Energy Services Ltd. hi kum 2008 a Indore a din niin, Carbon Credits Project Management, Carbon Credits Trading etc. ah India ramah chuan sulsutu an ni.

Restricted area
Serchhip district bawrhsap Kumar Ahishek chuan Covid-19 vei an pun zel avangin East Lungdar, Chhingchhip Venglai leh Chhingchhip Venghlunte chu hmun khuahkhirh bik (restricted area)-ah a puang. Restricted area puan hi January 3, 2022 aṭangin thupek thar a awm leh hma chu kalpui tur a ni a; thupek bawhchhiate chu IPC Section 188 hmanga hrem theih an ni.

CSC pan theih
Aizawl district bawrhsap Dr Lalhriatzuali Ralte chuan, Aadhaar card atana thla lak ngaite tan Aizawl district-a common service centres (CSC) pan theihte nimin khan a puang. December 17, 2021-a Aizawl Bawrhsap Pisapui kângin a tihchhiat avanga Aadhaar thlalak ngai tam takte'n harsatna an tâwk chu pawi a tih thu a tarlang bawk.

Dy. CM-in hawng
Mizoram Upa Pawl (MUP), Durtlang Branch-in chawlhbûk an sak thar chu nimin khan deputy chief minister Tawnluia'n a hawng. Tawnluia chuan, MUP chu pawl hlu, zahawm leh ṭangkai tak a nih thu sawiin, MUP member-te chu ṭhalaite Mizo nun ze mawi leh chìn dan ṭha leh an hriat lohte chu zirtira finchhuahtu ni turin a chah. Chawlhbuk hi 2018-ah sak ṭan a ni a, Art & Culture, UDPA, MLA fund leh councillor aṭanga hmuh cheng nuai 16.20 sénga sak a ni.