Mizoramah Covid-19 vei hmuh thar a pung mek

January 3, Thawhṭanni khan Mizoramah Covid-19 vei mi 347 hmuh chhuah a ni a; kuminah ni thum chhungin mi 723 hmuh belh tawh niin, ni tin a tam tial tial. Nimin khan Covid-19 vei dam tawh mi 112 chhuahtir an ni a, hripui vangin mi pahnih an thi.

Covid-19 vei hmuh thar mi 347-te chu mipa 152 leh hmeichhia 195 an ni a; ZMC laboratory-a hmuh chhuah pali, TrueNAT hmanga hmuh 44, RAT hmanga hmuh 294 leh FIA hmanga hmuh panga an ni. Swab sample endik zat aṭanga hripui vei hmuh zat chu 15.66% a tling.

IDSP record angin, Mizoramah Covid-19 vei 1,42,248 hmuh chhuah a ni tawh a, mipa 68,487 leh hmeichhia 73,761 an ni. Nimin tlai dar 5 thleng khan mi 1,39,976 (98.40%) chhuahtir an ni tawh a, mi 552 (0.39%) thi tawhin, enkawl mek mi 1,720 (1.21%) an awm.

January 3, Thawh­ṭannia Covid-19 vei hmuh thar mi 347 zingah symptom nei mi 271 awmin, 78.10% a ni a, mi 76 erawh chu symptom nei lo an ni thung.

Thawhṭannia swab sample endikna district pakua zingah positivity percentage 10% aia a sànna district pasarih a awm a, a sànna ber Mamit district-ah 37.21% a tling. Positivity rate 10% chung lam awmna district dangte chu Khawzawl 29.41%, Serchhip 25.69%, Saitual 20.37%, Champhai 18.48%, Lawngtlai 17.57% leh Lunglei 14.05% a ni a; Siaha leh Hnahthial district-ah sample endik a ni lo.

Mamit district-a Dárlâk khuaah hripui vei mi 35 hmuh belh niin, symptom nei vek an ni a; Serchhip district-a East Lungdar khuaah mi 26 hmuh belh niin, symptom nei vek an ni. IDSP tarlan danin, nimin tlai dar 5 thleng khan hripui vei dam tawh mi 112 chhuahtir an ni a; district tina chhuak zat chu - Aizawlah 59, Serchhipah 25, Khawzawlah 12, Kolasib-ah paruk, Lungleiah pali, Siahaah pathum, Lawngtlaiah pahnih leh Mamitah pakhat a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,42,248 chu mi 1,000 zelah hripui vei mi 129 an awm ang a ni a; mi 1,00,000 zela Covid-19 vangin mi 50 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 21, 2021 thlenga swab sample endik tawh 15,11,684 aṭanga RT-PCR hmanga endik zat percentage chu 21.85 a ni a, RAT hmanga endik zat chu 72.31% a tling.