Mizorama Covid-19 dinhmun sawiho

Nimin khan Health & Family Welfare minister Dr R Lalthangliana hoin Secretariat conference hall-ah Mizorama Covid-19 dinhmun thlirho a ni a, Covid variant thar Omicron thleng thei thlir lâwkna hun an nei nghal.

Ṭhutkhawmah hian ṭhutkhawm hmasaa thurel bawhzui dante thlir a ni a; uluk leh nasa zawka sûlhnu chhui, containment zone puan, sorkar laipuiin Omicron variant hmachhawn dan tura hriattirna leh inkaihhruaina a siam leh nasa zawka swab sample endik kalpui chungchangte sawiho a ni.

Health sub-centre tinah RAT kit dah tura ruahman ṭha an ti a; thawktu lama harsatna awm theite tarlan niin, a rang lama chinfel dan kawng dap vat tum a ni.

World Bank, NITI Aayog leh Ministry of Health & Family Welfare-in kum tin an tih chhuah ṭhin ‘Healthy States, Progressive India, Reports on the Ranks of States and Union Territories, Health Index Round IV 2019-2020’ 2021 kum tàwpa tih chhuahah state tê zingah Mizoram chu pakhatna a nih thu te, Mizoram chu ram pum state-te zingah overall leh incremental-ah pakhatna ve ve a nih thute tarlan a ni bawk.

Tarlan danin, Universal Health Coverage Day 2021 puala December 13, 2021-a The Ashok Hotel, New Delhi-a Consultation Workshop neihah Azaadi ka Amrit Mahotsav Campaign neih meka India rama state ti ṭhate lawmman hlan a ni a; Mizoram chu Wellness Activities-ah pathumna a ni.