Lunglei district-a kum 15-17 inkar Covid-19 vaccine pek dan tur sawiho

Lunglei district bawrhsap Kulothungan A hoin nimin khan sorkar hotute leh YMA Sub-Headquarters, Lunglei hruaitute chuan kum 15-17 inkarte hnenah Covid-19 laka invenna damdawi (vaccine) Covaxin pek dan tur an sawiho a, naktuk hian Lunglei High School-ah pek ṭan turin an rel.

Kulothungan A chuan, Lunglei district chu Covid-19 vaccine pek kawnga Mizorama ti ṭha ber zinga mi a nih thu sawiin, “Vaccine pek tura ruahman mi 1,04,897 aṭangin first dose 99,501 (94.9%) leh second dose 84,633 (85.1%) pek a ni tawh. Ṭhahnemngai taka hma latu Health department-a thawkte bakah, task force-te chungah ka lawm tak zet,” a ti.

Lunglei Bawrhsap chuan, tun hnaiah Lunglei district-ah hripui vei an pun chak leh tawh thu a sawi a; sorkar inkaihhruaina zawm a pawimawh thu leh vaccine la thei zawng zawngte chu la ngei tura a duh thute a sawi bawk.

Lunglei district immunization officer Dr Lalrinthangi tarlan danin, Lunglei district-ah hian kum 15-17 inkar mi 9,532 an awma ngaih a ni a; Covid-19 vaccine la kim tawh healthcare worker, frontline worker leh kum 60 chung lam natna dang (comorbidity) neite tan January 10, 2022 aṭangin booster dose pek tum a ni.

Health department leh School Education department-te chuan Lunglei district-a khua/veng tina kum 15-17 inkar hnena vaccine pek dan tur an siam dawn a; Lungsen leh Bunghmun BDO-te chuan an block chhungah action plan an siam bawk ang.