Covid-19 vangin 552 thi tawh

Nimin khan tlai dar 5 thlengin Covid-19 vangin mi pahnih an thi a, January 3, Thawhṭanni zanah mi pahnih an thi bawk a, an vaiin natna dang nei tel an ni. Mizoramah hripui vangin mi 552 an thi tawh a, tun January thla bikah mi paruk an thi tawh.

January 3, Thawhṭanni zan dar 6 khan C Lalnunzira (39), Sihphir chu Covid-19 vangin State Referral Hospital-ah a thi a; Covid-19 positive a ni tih December 18, 2021 khan hmuh chhuah niin, December 23 aṭangin SRH-ah enkawl a ni. Thawhṭanni zan vek dar 10 khan Lalawmpuia (49), Tuikual South chu SRH-ah a thi a; hripui vei a ni tih December 21, 2021 khan finfiah niin, December 22-ah SRH-ah dah luh a ni.

Nimin zing dar 7 khan RL Thanṭhuama (79), Champhai Bethel Veng chu hripui vangin Champhai DCHC-ah a thi a, Covid-19 vei a ni tih January 1 khan hmuh chhuah a ni. Remruatfela (1), Champhai Electric Veng pawh nimin khan Champhai DCHC-ah a thi a; Covid-19 positive a ni tih December 24, 2021 khan hmuh chhuah a ni tih sorkar thuchhuakin a tarlang.