Central service-ah Mizo kan tlem tawh ; Sorkarin theihtawpin ṭan a la - CM Hawla

Chief minister Lal Thanhawla chuan, Central service-ah Mizo an tlem tawh hle tih sawiin, Mizo ṭhalai tam zawk an luh theihna atan Mizoram sorkarin ṭan a lak thu a sawi.

CM Lal Thanhawla hian nimin khan Armed Veng Community Centre a hawng a; UDPA minister Zodintluanga kaihhruai hawnna inkhawmah thu sawiin CM chuan, "Central service-ah Mizo kan tlem tawh hle a, IPS phei chu kan neih hnuhnun ber chu kum 1995 a ni. Sorkarin Central service-a Mizo ṭhalai tam zawk an luh theihna atan Mizoram Youth Commission kaltlangin theihtawp a chhuah a. Ṭhalaite hian tum an neih a ngai a, college kal tawh tum la nei lo an awm nual ṭhin," a ti.

Lal Thanhawla chuan, sorkarin ṭhalaite khawvel thar siam turin theihtawp a chhuah tih sawiin, "Min beisei ang chu kan pha lo a ni mai thei a, mahse, sorkarin ṭhalaite khawvel atan theihtawp kan chhuah tih min hriatpui ula ka duh. Ṭhalaite hmakhua atan hmunhma kan din chho zel a ni," a ti a; nu leh pate chu an fate hmakhua atana ngaihtuahna séng turin a chah.

Hmunhma sorkarin din mah se, ṭhalaiten an hman ṭangkai loh chuan awmzia a nei lo ṭhin tih sawiin CM Hawla chuan, "Ṭhalaite'n hman ṭangkai nacháng an hria a, kan ṭhalaite'n infiamna khawvelah Zofate min chawimawi mek a ni," a ti a; sorkarin Mizo ṭhalaiteah beiseina sang tak a neih thu a sawi.

Home minister R Lalzirliana pawhin thu sawiin, Community Centre sak a nih laiin khawtlang mipuite'n engineer an rin tâwk thu a sawi a, "Engineer aia thiam emaw inti a, a páwng a taka sawisel tur zawng sek khawtlang hruaitute zingah an awm lo," a ti.

R Lalzirliana chuan, sorkarin ram hma­sawnna atan theihtawp a chhuah tih sawiin, "Hna thawh ṭhat leh thil ṭha tih eng emaw zat kan nei tawh a ni," a ti a; sorkarin hmasawnna hnathawh tur eng emaw zat a la neih thu a sawi.

Bialtu MLA Lasawta, Finance minister pawhin thu sawiin, "He bialah hi hian hmasawnna atan duhsakna tam tak kan dawng a. Sorkar leh mipuite kan ṭawngṭaina atana ka duh chu, 'Kan ram leh kan hnam min hruaia'n nang chau kan thlang che...' tih hi a ni," a ti.

Armed Veng Community Centre hawn inkhawmah hian Armed Veng Local Council chairman R Vanṭhuama leh YMA president Z Lalchhuanawma te pawhin thu an sawi a; minister of state Vanlalawmpuii Chawngthu, deputy speaker R Lalrinawma, MLA Lalrobiaka, AMC mayor PC Lalhmingthanga, Planning secretary Dr C Vanlalramsanga leh DGP-te pawh an tel a ni.

Community Centre hi SPA leh NEDP sum cheng nuai 640 sênga sak niin, chhawng thum a ni a; parking, conference hall, table tennis hall, taekwondo hall, basketball court, committee room, etc. a awm a ni.