Zosap missionary Rev. Alwyn Roberts a thi

Zosap missionary zinga Mizoram chhuahsan hnuhnung ber zinga mi, Rev. Alwyn Roberts (84) chu nimin zing dar 2 khan cancer natna vangin Bangor, Wales-ah a thi. Amah hi Mizorama zirna kawnga sûlsutu leh Pachhunga University College (PUC) principal hmasa ber a ni.

Rev. Alwyn Roberts hi Mizorama college hmasa ber Aijal College (tuna Pachhunga University College ni ta) enkawl turin Mizoramah a rawn kal a, Aijal College principal hmasa ber niin, January 1961 atanga September 1967 thleng principal a ni. Mizoramah kum 1960-1967 chhung a awm a, Mizoram a buai avangin kum 1967-ah an ramah an haw a ni.

PUC principal Dr Tawn­enga chuan, PUC-in tun August thlaa diamond jubilee an lawm turah thuchah ziak turin Rev. Alwyn Roberts hi an sâwm a, mahse, an sawmna a tihlawhtling hman ta lo tih a sawi a, "Mizorama zir­nain hma a sawn zelnaa bul ṭantu Rev. Alwyn Roberts boral ta hi Zofate tan chàn­na nasa tak a ni," a ti.

PUC chuan thuchhuah siamin, PUC-in tun dinhmun a thlen theihna tura theih­tawp chhuaha hma latu Rev. Alwyn Roberts chu an college-in an ui tak zet thu leh, a kalsan tâk a chhungte Pathianin thlamuan se an duh thu an tarlang.

Rev. Alwyn Roberts hi August 13, 2018 chaw­hnu dar 1-ah a lawina kohhran, Berea Newydd Chapel, Bangor-ah vui a ni ang.