Khaw 9-a sikul khâr titawp rih dawn

3rd August, 2018

Mizorama lumpsum grant-in-aid higher secondary school (HSS) pakuate adhoc grant-in-aid dinhmuna dah phût vanga khaw pakuaa sikul khâr mek chu tihtawp a ni dawn. Hemi rual hian, hma an la chhunzawm zel dawn a, remchang hmasaah Aizawlah kawng an zawh dawn tih an puang.

Mizoram Govt, Lumpsum Grant-in-Aid Higher Secondary School Association (MIGLAHSSA) leh lumpsum HSS awmna khuaa Joint JU hruaitute chuan nimin khan Aizawl Press Club-ah thuthar thehdarhtute an kâwm a; Joint SU president J Lalrorela chuan, "Sorkar duh dan angin sikul khâr kan titàwp phawt dawn a, sorkar pawhin kan thil phût hi min tihhlawhtlinsak ve kan beisei a ni," a ti.

Joint JU President chuan, lumpsum HSS awmna khaw pakuaa sikul leh sorkar pisa zawng zawng an khar chu vawiinah an titawp dawn tih sawiin, "Vawiin

aṭangin sikul an kal ṭan leh ang," a ti a; June 18, 2018 aṭanga khâr tawh lumpsum HSS-te erawh chu kar leh Thawhṭanni aṭanga an kal

ṭan tur thu a sawi.

Lumpsum HSS awmna khuate hi Sakawrdai, Phullen, Farkawn, NE Khawdungsei, East Lungdar, Thingsulthliah, Zobawk, West Phaileng leh Zawlnuam-te a ni. Sorkar thuchhuahin lumpsum HSS 11 a awm nia a tarlan chungchanga zawhna chhangin MIGLAHSSA general secretary R Lalfakawma chuan, "Pahnih dang hi Siaha-a Baptist Kohhran HSS leh Aizawla Oxford HSS-te an ni a, anni hi chu kohhran sikul leh private commercial sikul an ni," a ti.

R Lalfakawma chuan, Mizoramah lumpsum aided school 71 an awm thu sawiin, "Heng zingah hian khawtlangin an din chu sikul 26 a ni a, a dang zawng chu private commercial school a ni," a ti a; chutih rualin, kumin March thlaa Assembly session-ah School Education minister-in khawtlang din lumpsum school 28 a awm thu a sawi tih a sawi.

Adhoc aided-a hláng kai turin kum 2013 aṭangin ṭum eng emaw zat sorkar an dawr tawh thu sawiin R Lalfakawma chuan, sorkar erawh chuan lumpsum ṭanpuina kum khata Rs. 1,50,000 a pek ṭhin chu Rs. Rs. 3,00,000-ah tihpun a tum nia an hriat thu a sawi a, "Kum hnih/khat kal taa sikul din tharte leh keini kum 14 chuang ding tawhte ang khata min hrût rual tumna an neiin kan hria a, ruahmanna an siam fel hma chuhin hma kan la ta a ni," a ti.

Khawtlang din lumpsum HSS-te kumin July 18 aṭanga an khâr ṭan aṭanga ni 41 hnu, July 29-ah sorkar hotute'n an chungchang chu an ngaihtuah chauh leh sum a awm lo tih chhuanlama an hmang chu mak an tih thu sawiin, "An thêngthâwngah kan thawk tham lo a ni ber mai," an ti a; sorkarin thingtlang mite zirna a ngai pawimawh tak zet a nih chuan adhoc grant-in-aid ah a dah thuai an beisei tlat thu an sawi bawk.

Adhoc aided dinhmuna dah phût ve tho lumpsum middle school leh high school (MIGASA)-te nen hmalakho an tum leh tum loh chungchanga zawhna chhangin MIGLAHSSA GS chuan, "Keini hi khawtlang din liau liau kan ni a, MIGASA-ah hian commercial school-te an tel a, khawtlang din bik hi an kal hrang thei a nih chuan hmalakho theih dante pawh a awm ang," a ti.

1. Tuisualral HSS: Kum 2005-a din, July 17, 2008-a lumpsum-a hlân kai. Principal nen zirtirtu pariat leh zirlai 77 an awm mek a; a awmna Sakawrdai bakah, Vaitin, Khawpuar, New Vervek, Lungsum, Damdiai, Thingsat, North Khawdungsei, Upper Sakawrdai, Ṭinghmun, Mauchar, Palsang, Zokhawthiang leh Manipur aṭangin zirlai an lut.
2. Thingsulthliah HSS: Kum 2004-a din, kum 2008-a lumpsum-a hlân kai a ni. Zirtirtu paruk leh zirlai 136 an awm mek a; Thingsulthliah bakah, Seling, Sesawng, Tlangnuam leh khaw dang dang aṭangin zirlai an lut.
3. Farkawn HSS: April 16, 2004-a din, July 17, 2008-a lumpsum-a dah a ni. Zirtirtu paruk leh zirlai 83 an awm mek. Farkawn bakah, Samthang, Khankawn, Vaphai, Ṭhekpui leh Ṭhekte aṭangtein zirlai an lut.
4. West Phaileng HSS: May 14, 2004-a din, October 1, 2008-a lumpsum-a dah a ni. Zirtirtu paruk leh zirlai 60 an awm mek a; West Phaileng bakah an khaw chhehvel aṭanga lut an awm.
5. Zobawk HSS: September 13, 2003-a din, July 17, 2008-a lumpsum-a hlân kai a ni a, zirtirtu panga leh zirlai 66 an awm mek. Zobawk bakah, New Dâwn, New Ralvâwng, Lungpher, Sairêp, Hrangchalkawn, Theiriat leh Bualte aṭangtein zirlai an lut.
6. Phullen HSS: January 23, 2004-a din njin, kum 2008-ah lumpsum-a dah a ni. Phullen bakah, Phuaibuang, Khawlian, NE Tlangnuam, Dáido, Záwngin, Làmherh leh North Khawlêk aṭangtein zirlai an awm a; zirtirtu panga leh zirlai 67 an awm mek.
7. East Lungdar HSS: Kum 2003-a din, kum 2008-a lumpsum-a hlânkai a ni a, zirtirtu panga leh zirlai 53 an awm mek. E. Lungdar bakah an chhehvel khua aṭangin zirlai lut an awm.
8. NE Khawdungsei HSS: Kum 2003-a din, kum 2008-a lumpsum-a dah a ni a; zirtirtu panga leh zirlai 43 an awm mek. NE Khawdungsei bakah, Khawkâwn, Chiahpui, Suangbem, Mímbung leh Teikhang khuate
aṭangin zirlai an lut.
9. Zawlnuam HSS: April 1, 1996-a din, October 1, 2008-a lumpsum-a hlankai a ni a, zirtirtu 11 leh zirlai 72 an awm mek. Zawlnuam bakah, Búngṭhuam, Záwlpui, Kânhmun, Zamuang, Réngdil, Hriphâw leh Tripura aṭangtein zirlai an awm.