Remna Rûn Làwi lungphun hawng

Peace Accord MNF Returnees' Association (PAMRA)-in Remna Rûn, Luangmuala 'Remna Rûn Lawi' hriatrengna lungphun an siam chu nimin khan chief minister Lal Thanhawla'n a hawng. Chief Minister chuan, ram tana nunna hlân­tute hlutzia leh rál do tura chhuak lo kîr lehte tuamhlàwm a pawimawh thu a sawi.

CM Lal Thanhawla chuan, rambuaiin mipui tan harsatna hrehawm tak a thlen dan te, ei leh in tur, silh leh fên turah harsatna a thlen dan te, khawtlang nun a tiderthâwngin a tlakhniam phah thute a sawi a; remna thuthlung ziah hnua Mizoram chu India state zinga rál­muang berte zinga mi a ni zui ta chu lawmawm a tih thu leh, rammute, remna avanga lo kirte tuamhlawm chu pawimawh a tih thu a sawi a ni.

Chief Minister chuan, remna leh muanna rah Mizoramin hmu zelin tih sawiin, Mizoram econo­my pawh India state lian zawkte leh India pum huapin a ṭha berte zinga mi a nih thu a sawi a; "Remna leh muanna rah ei leh bara hmasawn tura hmalaknate hi chak zawka kalpui a, hman ṭangkai an nih theih nan mipui ṭan­rual a pawimawh hle a ni," a ti.

Lungphun hawnnaa khualzahawm, minister PC Lalthanliana chuan, "Ramin zalenna a sual laia ram tana ka tih ve theih sang ber chu zalenna zualtute zinga pakhat nih ve kha a ni," a ti a; rambuai laia mipui tawrhna a reh theih nana remna ziaktute chu fakawm a tih thu sawiin, PAMRA-te'n lung phun nachang an hria chu lawmawm a tih thu a sawi.

Remna Run Làwi champha puala lungphun hawnnaah hian zalenna sualtu thi tawhte sûnna hun hman a ni a; political party hrang hrang aiawhte leh NGO ṭhenkhat aiawh­te pawhin thu an sawi.

Lungphun hi Mizo­ram sorkarin sum a pek leh pawl leh mimal thawhkhawm sum tling­khawm hmanga siam a ni a; a hawnnaah hian minister R Romawia leh Vanlalawmpuii Chawngthu-te pawh an tel a ni.