Aspirational District-a hmalakna tur sawiho

Mizorama district zinga India ram pum huapa district tihhmasawn leh chawikân ngai bika puan, Aspirational District-a tel, Mamit district chu zirna lama tihhmasawn dan tur ngaihtuahin nimin khan Mamit DC conference hall-ah sorkar hotute an ṭhukhawm a; School Education secretary Esther Lalruatkimi'n a kaihruai.

Meeting-ah hian, Mamit district-a Silsury, Bazirung, Nàlzáwl, Dárlâk, Thinghlun, Luimawi, Kanhmun, Bâwngva, New Eden leh Tumpánglui khuaahte naupang sikul kal tawh lo eng emaw zat an awm thu leh, sikul an kal leh theih nana hmalakna, Back to School Campaign neih a ni tawh thu tarlan a ni.

Esther Lalruatkimi chuan, zirna chu Aspirational District atana tehfung pawimawi tak a nih thu sawiin, zirnain a hrin chhuah te, thla thum danah hmasawnna dashboard-ah thlir ṭhin a nih avangin Mamit district-a zirna lama thawkte chu theihtawp chhuah turin a chah a; tehfung aṭangin hmasawnna hmuh a nih ngei theih nan ṭan lak nasat a ṭul thu a sawi.

Aspirational District-ah hian zirna-inte'n inthiarna leh tui thianghlim an neih theih nana hmalak tum a ni a, hemi hmang hian sorkar sikul bakah, SSA leh RMSA hnuaia sikulte tuam tum a ni.

Meeting-ah hian Aspirational District-a state coordinator Dr Saraju Devi pawh a tel a, Mamit khawpuia zirna-in hrang hrang paruk a endik nghal a ni.