District 3-ah Swachh Survekshan hawng

Nimin khan Mamit, Kolasib leh Siaha district-ahte India ram puma thingtlang khuate faina lama an inelna tur, Swachh Survekshan Grameen (SSG) hawn a ni.

Kolasib district-ah chuan Thingdawl V/C House-ah hawnna inkhawm neih niin, Tui­rial bialtu MLA Hmingdailova Khiangte-in a hawng a; MLA chuan, Mizoramin faina chung­chang a ngaihsak hma a, hun rei tak aṭang tawhin Faina Hapta hming ṭhin a nih thu sawiin, "India Hnampa Mahatma Gandhi khan India mipuite chu faina lamah hma an sawn theihna turin a zirtir nasa ṭhin a, 'Independence aiin faina hi kan tan a pawimawh hmasa zawk' tiin a sawi hial a ni," a ti.

Hmingdailova Khiang­te chuan, Mizo zingah lehkhathiam an tam tawh ngaihtuahin hmasawnna tur a la tam thu a sawi a, "Kan lui dung zawng zawngah polythene a khat tawh a, hengte hi kan ngaimawh a hun tak zet a ni," a ti bawk.

Mamita hawnna inkhawmah chuan Mamit district-a khaw hrang hrang aṭangin V/C member-te an tel. A hawngtu PHE SDO Lalzuala chuan, Mamit district mipuite chu khaw fai ber lawmman lak tum ṭheuh turin a chah a, "Swachh Survekshan Grameen hi mipuite'n kan hmelhriat ve a nih tih leh, khaw­tlangin faina leh thiang­hlimna kawngah kan ṭangkaipui ve a nih tih Central lam kan hriattir theihna tur­in mobile application siam a ni a, Playstore aṭangin Swachh Survekshan Grameen, 2018 tiin dowload theih a ni," a ti.

Siaha-ah chuan DRDA Conference Hall-ah hawnna inkhawm neih niin, district election officer B Malsawmtluangi'n a hawng. B Malsawmtluangi chuan, faina tluantling nei turin sorkar leh mipui thawhho ṭhat a ṭul thu a sawi a, "Chhung tin leh mi tinte rilruah fai leh thianghlim duhna leh ngainatna chi nung a awm hmasak phawt ngai a ni," a ti.