MGNREGS hlawh lak theih loh sawiho

Thenzawl khuaa MGNREGS hnuaia inhlawh zinga chhungkaw eng emaw zat chuan hlawh an la thei lo a; an bank account-a an hlawh tur a luh ve loh vanga harsatna an neihte chu nimin zing khan Serchhip BDO Vanlalhmachhuana hoin Thenzawlah sawiho a ni.

Inkawmhonaah hi Serchhip BDO-in a kaihruai a, MGNREGS additional project officer James Ronghaka'n MGNREGS hmanga hna thawh leh job card nei inhlawhte bank account-a an hlawh thun dante a sawifiah. Thenzawla V/C hotute leh MGNREGS hlawh dawng ve lote'n an harsatna tawhte an sawi bawk.

Sorkar official-te chuan, MGNREGS hnuai­a inhlawhna mi eng emaw zatte bank account-ah lut lo a la awm tih sawiin, a chhan ber pakhat chu, sorkar laipui aṭanga sum hmuh a tam loh vang a nih thu an sawi a; sorkar laipui aṭangin sum dawn belh a nih veleh hlawh la la ve lote account-ah an hlawh a luh mai an beisei thu an sawi a ni.

Thenzawl khuaa MGNREGS hnuaia inhlawh, an bank account-a an hlawh lut ve thei lo chhungkaw 60 vel chu July 29, 2018 khan an lo inhmukhawm tawh a; an harsatna chu chinfelsak thuai turin sorkar thuneitute an lo phut tawh a ni.