Congress hi Delhi vai duh dana kal an ni - MNF Vice President

MNF vice president R Tlanghmingthanga chuan, Congress party chu Delhi vai duh dana kal an nia sawiin, "An ruangám Mizo ni si, an thinlung vai ni siin ro min rèlsak mek a, a ram neitute nen chuan ram leh hnam enkawl kawngah kan inthlau lo thei lo," a ti.

MNF Vaivakawn unit-in nimina mi thar lawm luhna inkhawm an buatsaihah thu sawiin R Tlanghmingthanga chuan, "Tun inthlan lo thleng mai turah hian a neitu dik tak kutah he ram leh hnam hi kan dah a ngai a ni," a ti a; mikhual sorkar paihthla turin Mizo mipuite inbuatsaih turin a sáwm.

MNF Vice President chuan, Mizo zawng zawng chu an pian tirh aṭanga MNF sa vek an nia sawiin, "Mahni inpuia haw nacháng hre mai lo kan awm ṭhin mai a ni. Mahni inpui MNF-a lo láwi zel tur­in Mizo zawng zawng kan sawm a ni," a ti.

Vaivakawn bialtu MLA Lalruatkima pawhin thu sawiin, kum 10 chhung Mizoramah gas a harsa nia sawiin, a chhan ber chu kawng chhiat vang leh MNF sorkar laia din Mualkhang Bottling Plant-in mamawh zat a phuhrûk zawh tawh loh vang niin a sawi.

Lalruatkima chuan, gas phur turin transportation tender kum 5 dan velah chhuah ṭhin a nia sawiin, "Congress sorkarah kawngpui a chhiat zual zel avangin transporter-te'n Mizoram gas an phurh ṭhat duh ṭhin loh avangin harsatna kan tâwk ta a ni. Gas-a kan harsatna tawh sukiang turin MNF sorkar hun­ah LPG bottling plant thar siam turin chak taka hmalak a ni ang," a ti.

Ration chini chu sor­kar laipuiin kg. khatah subsidy Rs. 18.50 a pe thei reng tih sawiin Lalruat­kima chuan, "Congress sorkarin sum harsatna chhuanlamin kum nga kal ta aṭang khan rationchini an titawp ringawt mai a. Mipui mamawhna hriain MNF sorkar veleh ration chini hi retailer kaltlangin mipui hnenah sem leh dawn a ni," a ti bawk.

MNF thuchhuah chuan, nimina Vaivakawn­a mi thar lawm luhna inkhawmah hian Congress party leh party dang aṭangin voter 109 MNF-ah an lawm lut niin a tarlang.