Rajya Sabha chairman chungah eptute lungawi lo

Eptu party-te chu Rajya Sabha chairman Venkaiah Naidu-an debate-naa hun a pek ve duh loh vang te, rolrellai party a duhsak bik avang leh thil hote hmanga house rorel inkhawm a tihtawp ṭhin avangin an lungawi lo hle. Venkaiah Naidu laka an lungawi lohna tarlanna, draft letter an siam.

Rajya Sabha chairman laka draft letter an siamah hian eptu hruaitu chuan, "Rajya Sabha chanchina a thlen vawikhatna atan House chu minute 10 chhung atan chauh tihtawp lailawk a ni a, hei hi BJP president Amit Shah-an thu a sawi zawh theihna tura ruahmanna niin a lang a ni" a ti. Eptute chu chairman in rorel inkhawm a kaihhruai dan kawngah an lawm lo hle tih a sawi bawk.

Eptute chuan House chairman Naidu chu umpire tur a ni laiin, player ang maia a chet ve thu an sawi.

Hetihlai hian Rajya Sabha official chuan eptuten House chairman an puhna chu thu awmze nei lo niin a sawi thung a, eptu lam chuan thu bulbal pawh neiloa rorel inkhawm auhbuai an tum fo thu a sawi.

Chairman Naidu laka lungawi lohna draft letter hi Congress hruaitu, House-a eptu hruaitu Ghulam Nabi Azad siam niin, eptu party dang hruaituin a endik ve leh a ni. House-a eptu party hrang hrang hruaite chuan an hming an ziah hnan an beisei thu an sawi a, hetihlai hian Telangana Rashtra Samithi leh Biju Janata Dal hruaitute chuan an hming an ziah ve dawn loh thu an sawi.