Muzaffarpur case: SC-in centre leh Bihar sorkar hriattirna pe

Bihar-a Muzaffarpur shelter home-a hmeichhe naupang enkawlte pawngsual nia sawia thubuai siam a nih chungchangah Supreme Court chuan sorkar laipui leh Bihar state sorkar chu thil awmdan kimchang thehlut turin a hriattir.

Muzaffarpur shelter home-a thil thleng hailan a nih hnuah Bihar Governor Satya Pal Malik chuan sorkar laipui leh state sorkar te chu state chhunga shelter home-a thil dik lo titute chungah hremna na tak lekkawh turin a ngen a ni. Governor-in ngenna a siam hnuah Supreme Court chuan he hriattirna hi a tichhuak ta a ni. Governor hian a ngenna hi Bihar Chief Minister Nitish Kumar, Union law Minister Ravi Shankar Prasad leh Patna High Court Chief Justice-te hnenah a thawn a ni.

Shelter home-a hmeichhe naupangte pawngsual nia sawi a nih vangin nimin khan Bihar-a Left party-te chuan lungawi lohna lantirin bandh an huaihawt a, Chief Minister Kumar chu bang turin an phut. He bandh hi Rashtriya Janata Dal (RJD), Congress Party, Hindustani Swam Morcha, Samajwadi Party leh Lokrantrik Janata Dal ten an thlawpa ni.

Bandh huaihawt vang hian rel leh road traffic a buai phah hle a, rel kawngte an dan avangin rel 12 chuang service a khaihlak phah a ni.

Muzaffarpur-a NGO Seva Sankalp Evam Vikas Samiti siam shelter home-a hmeichhe naupang enkawl 34 te chuan pawngsual an tawk nia sawi a nih bakah, home danga hmeichhe 11 te chu chin hriat lohin an awm bawk. He thubuai hi Central Bureau of Investigation (CBI) kutah hlan a ni tawh. Home siamtu NGO chu blacklist-ah telh niin, an home-a hmeichhe naupang enkawlte chu district danga shelter home-ah sawn vek an ni tawh bawk.