High Court-in NLUP sem a 'stay'

MNF hruaitute chuan nimin tlai khan Aizawl Press Club-ah thuthar thehdarhtute an kâwm a; Gauhati High Court (GHC), Aizawl Bench-in NLUP sem mek chu chawlhkar li chhung sem rih loh turin a 'stay' tih an sawi.

MNF general secretary MC Lalrinthanga sawi danin, eptu MLA paruk, NLUP dawng tur thlang tura tih an nih loh laiin, MLA pawh ni lo Congress mi leh sa pali chu NLUP dawng tur thlang tura tih an nih avangin Vanramchhuangi, Chaltlang-in NLUP dawng tur thlan dan chungchangah hian Gauhati High Court, Aizawl Bench-ah Public Interest Litigation (PIL) a thehlut a ni.

High Court chuan Vanramchhuangin petition thehluh chungchangah hian nimin khan interim order a tichhuak a; chawlhkar li chhung NLUP sem chawlhsan hrih turin Mizoram sorkar a hriattir a ni. Chawlhkar li chhunga sawifiahna High Court-a thehlut turin Mizoram sorkar a hriattir bawk.

Vanramchhuangi ukil C Lalramzauva chuan PIL an thehluh bakah hian Comptroller and Auditor General of India (CAG)-in kum 2011-12 leh 2015-16 inkara NLUP sem leh sum dah hran danah dik lo leh felhlel tam tak a hmuchhuahnate Court-ah an pharh tel.

Court order-a a lan danin, NLUP dawng tur thlan danah guidelines (inkaihhruaina) siam a nih leh nih loh zawh a nih chungchangah sorkar ukil chuan insawifiahna hun pe turin Court a dil a ni.

Sorkar ukil Samuel Vanlalhriata dil ang leh PIL-a tarlante ngaihtuahin, Justice Suman Shyam leh Justice AM Bujor Barua te ṭhutna High Court Division Bench chuan, Mizoram sorkarin langtlang tak leh Indian Constitution-in intluktlanna chanvo mi tin a tiam angin beneficiary-te thlang se la, beneficiery thlan dan Court a hriattir leh hma chuan NLUP chu titawp rih turin a ti ta a ni.

Chawlhkar li hnulah petition chu ngaih­tuah chhunzawm leh atan dah a ni a, chumi hnuah chuan NLUP sem chhunzawm a nih dawn leh dawn loh a hriat theih dawn a ni.