August 7-ah MIMER hawn a ni dawn ; Zirlai 73-in MBBS admission an ti tawh
Mizorama medical college din thar, Mizoram Institute of Medical Education and Research (MIMER) chu August 7, Thawhlehni khian chief minister Lal Thanhawla'n a hawng dawn.
MIMER-ah hian zirlai 73-in admission an ti tawh a, August thla chhung admission hun hawn tum a ni.
MIMER hawn tur chungchang leh tuna a dinhmunte Health minister Lal Thanzara'n nimin khan CMO conference hall-ah thuthar thehdarhtute a hrilhfiah a; MIMER chu August 7, 2018-ah Chief Minister-in a hawn dawn thu sawiin, "Programme pawh kan duang fel tawh. Tunah hian faculty duhthusam ang la nei lo mah ila, mahse, Medical Council of India (MCI)-in an ngaihhnathiam theih chin kan nei a, tih tur tam tak a la awm chungin kan hawng dawn ta a ni," a ti.
Lal Thanzara chuan, MIMER-ah tun thla, August 1-ah class ṭan tum ni mah se, ṭan theih a la nih loh thu sawiin, "Medical college dangte pawhin August 1-ah chuan class an ṭan thei bik lo," a ti a; August 7-a hawn a nih tûk, August 8-ah orientation class ṭan a ni ang a, August 20 velah class pangngai ṭan tum a nih thu a sawi.
MIMER chu din thar hlak a nih avangin duhthusama peih a la nih loh thu sawiin Health Minister chuan, "Furniture-te pawh awm sa a awm lo a, a thar veka dah tur a nih avangin vawi leh khatah neih kim vek theih a la ni lo. Chutih rualin, furniture leh mamawh dangte dah luh mek zel a ni a, a nih tur ang la ni vek lo mah se, class ṭan hunah ṭan theih a ni ang," a ti.
MIMER-ah hian teaching faculty 79 leh non-teaching faculty 12 awm tawhin, an vaiin mi 91 an tling tawh a, hei hi faculty post awm aṭanga 75% vel a ni. MIMER director Dr L Fimate chuan, zirtirtu turte chu an ṭhat tâwk thu sawiin, "Faculty an ṭha hlawm em em a, kan confident khawp mai," a ti a; faculty-te chu mithiam leh tawnhriat nei ṭha tak tak an nih thu a sawi.
MIMER-a faculty-te chu State Referral Hospital-a thawk an nih nghal thu sawiin Health department hotute chuan, "Doctor thiam tak tak an awm dawn a, medical college behchhan damdawi-in a nih angin, damdawi-in ṭha leh changtlung tak a ni dawn," an ti.
MIMER-a nodal officer Dr Jane Ralte sawi danin, nimin thleng khan MIMER-ah hian MBBS zir turin zirlai 73-in admission an ti tawh a, chu'ng zinga 11 chu Non Resident Indian (NRI) quota-a zir turte an ni; NRI quota hi seat pali a la âwl. Central pool-a quota awm zat, seat 15 luah khattu turte list pawh August 2 khan tihchhuah a ni a, chu'ng zirlai 15-te chu hnam dang vek niin, an hnawhkhat vek dawn a ni. Seat 100 awm zinga 70 chu Mizoram quota a ni a; Mizoram quota-a lut tur zinga mi 62-in admission an ti tawh.
MIMER hotute sawi danin, MIMER-ah hian a kum khatnaah subject patuhm - Anatomy, Physiology leh Biochemistry-te a awm dawn a; a kum hnihna aṭangin subject panga - Microbiology, Pathology, Pharmacology, Forensic Medicine and Toxicology leh Community Medicine-te a awm dawn a ni.