Pipe puak vanga buaina a tawp dawn - PHE Minister

AMRUT sum hmanga Aizawl châwmtu Greater Aizawl Water Supply Scheme (GAWSS) Phase-I tihchangtlun hna thawh zawh tak, 'Improvement of Aizawl Water Supply Scheme' chu nimin khan Dihmun­zawlah PHE minister Zodintluanga'n a hawng. Minister chuan, GAWSS Phase-I tihchangtlun a nih avangin tui pipe puak ṭhin vanga buaina thleng ṭhin a tawp tawh dawn thu a sawi.

PHE Minister chuan, Improvement of Aizawl Water Supply Scheme hnuaiah Aizawl tui lâkna kum 30-a upate chu a thar hlaka thlak a nih thu a sawi a, "Phase-I pipe hi a upat tawh êm avangin kar tin mai hian a puak ṭhin a. Kum 1988 daiha mi tawh Aizawl châwmna pipe-te hi a hlui tawh a, tih vak ngaihna a awm si lo. Minister ka nih tirh khan a chhia venna atan thlavéng kan lei a, pipe hi kar khat danah pûtin a puak reng a ni. Ni khat lek tui pump a khailak chuan tui sem nasa takin a tibuai ṭhin," a ti.

AMRUT hnuaiah engineer-te'n mipui har­satna hre rengin Aizawl châwmtu Tlawng tui lâk thawm ṭhatna leh tih­changtlun ngaih pawi­mawh hmasakah dah a ni a, ṭha takin an thawk zo tih sawiin Zodintluanga chuan, "Engineer-te chungah lawmthu ka sawi a ni. Pathian zarah chhiatna lian zawk a thlen loh chuan tui pipe hi puak lo tura beisei a ni. Tluang taka tui hi pump theih tawh turah kan inngai," a ti a; mimal tui la thar turte tana awlsam zawk nan distribution line metre 16,645.50-a thui siam belh a nih thu a sawi.

PHE Minister chuan, GAWSS Phase-III siam mek a nih thu sawiin, "Aizawl tui lakna phase-I hi mihring 80,000 châwm tur a ni a, phase-II hi mi 2,00,000 châwm tura duan a ni. GAWSS Phase-I leh Phase-II hi mi 2,80,000 chawm tura duan a ni a, tunah hian Aizawlah mikhual (floating population) nen hian mi 4,00,000 vel awma chhût a ni. Hei vang hian sorkar chuan ni khata tui litre nuai 370 (37 MLD) pump thei tur phase-III a siam leh mek a ni," a ti.

Inkhawma tarlan danin, GAWSS Phase-I (1988) leh Phase-II (2007) ringin Aizawl hi châwm a ni a, JNNURM hnuaiah kum 2014 khan Aizawl tui lâkna cheiṭhat a ni. Tun sorkar chhung hian AMRUT scheme kaltlangin Aizawl châwmtu tui lakna pahnih hi kum 2016-17 khan cheng nuai 1,550 sênga chei ṭhat a ni. Phase-I pipe hlui tawh puak fo ṭhin vanga harsatna thleng ṭhin chu pipe lian milimetre 350 hmanga thlak a ni a, metre 6,060-a thuiah pipe thar phûm a ni.

AMRUT hnuaiah vêk hian Dihmunzawlah duty house te, Phase-II site office te, Dihmunzawla PHE Complex siamṭhat hna te, Phase-I VT duty room thar sak te, Phase-I chemical store thar leh pumphouse duty room thar sak te, filter house sak hnate thawh a ni a; pipe thar phûmte nen a vaiin cheng nuai 1,350 sên a ni.