KHAWTHLIR

NLUP-NEDP training
UDPA department chuan nimin khan Zarkawt community hall-ah NLUP-NEDP Convergence Scheme Phase-II ṭanpuina dawngtute an ko khawm a, NLUP-NEDP Convergence Scheme kalpui dan an hrilhfiah a, minister RE Romawia'n fuihna thu a sawi. Training-ah hian Aizawl East-I, Aizawl East-II, Aizawl North-I, Aizawl North -II leh Aizawl North-III biala beneficiary 435 an tel a ni.

Street campaign
PRISM party chuan thuchhuah siamin, Aizawl khawpui chhunga hmalakna hmasa atan street campaign ṭan an tum thu an tarlang. PRISM chuan, Aizawla street campaign chu khawpui chhung hmun hrang hrangah an nei dawn a, organiser-te'n thil ṭul leh ruahmanna an siam dawn tih an sawi a ni.

Thla 2 hun pe
Dinthar Branch YMA chuan YMA kumpuan bawhzui nan August 2, Ningani zan khan an venga Mizoram páwn lam aṭanga hna thawk leh mi in luaha awm mi 120-te chu YMA Hall-ah an ko khawm a; hnam dang, ILP nei lote chu thla hnih chhunga nei turin an hriattir.

MADC session
Mara Autonomous District Council (MADC) fûr ṭhutkhawm, August 1-a ṭan chu nimin khan zawh a ni. MADC session-ah hian LAD changtu executive member MH Tiabi bill put luh pali - The MADC (Village Council Amendment Bill) 2018 te, The MADC (Animal Control and Taxation Bill) 2018 te, The MADC Town Council or Committees (Amendment) Bill, 2018 te, The MADC Market (Amendment) Bill, 2018 te leh, CEM N Zakhai-a'n amendment rules pali a put luhte pass a ni.

Hostel hawng
Kolasib bialtu MLA PC Zoram Sangliana chuan August 2, Ningani khan Kolasib-a CZS Higher Secondary School boys hostel sak thar a hawng. Hostel hi PC Zoram Sangliana MLA fund Rs. 6,70,000 sênga sak a ni a, zirlai 20 awm theihna tura ruahman a ni.