Vai hlau mi chu ni ila lalṭhutthleng hi ka kian lo ang - Hawla

Chief minister Lal Thanhawla, Congress party president ni bawk chuan, remna leh muanna chu Lal Isua programme a nih thu sawiin, "Vai hlau mi chu ni ila lalṭhutthleng hi ka kian lo ang," a ti.

Nimina Congress Bhavan-a inkhawm­ah Lal Thanhawla chuan, "Lal Isua lama ṭan hi a hlâwk em em a, a lama kan ṭan chuan kan lamah a ṭang ṭhin. Rambuai pik chhah lai bera kan mamawh chu remna leh muanna a ni a, remna leh muanna hi Lal Isua programme a ni. Mite'n 'Delhi vai khuang ben ruala lám' titein min hmusit mah se, mahni sorkar namthluin lalṭhutthleng kan kian a ni," a ti a; khawvelah mahni sorkar namthlua lalṭhutthleng mi dang kian an la awm ngai lo niin a sawi.

Congress party President chuan, MNF-te chu Mizo nationalism sawi sawi ve tur an ni em, tia a ngaihtuah ṭhin thu sawiin, "Nationalism hi ká-ah a awm lo a, thinlungah a awm zawk. Vai hlau mi chu ni ila lalṭhutthleng hi ka kian lo ang. Central lama hotute'n hel hotupa hnena sorkar hlan kan remti lo, an ti a; nimahsela, remna leh muanna a awm theih nan kan intiam tawh angin lalṭhutthleng kan kian ta a ni," a ti.

Lal Thanhawla chuan, MNF leh India inremnaah khan sût leh rual lohin India hnam leh sakhuate zawm turin kan rawn inpe e, tiin MNF-te chu India hnuaiah an inpe niin a sawi a; "Arjun Singh-a hnenah Mizo nationalism hi an hralh daih tawh a ni," a ti bawk.

Congress party thuchhuah chuan, nimina Congress Bhavan-a inkhawmah hian MNF general headquarters-a secretary HD Renthlei, Saituala MNF block hruaitute leh anmahni zuitu mi 25-te an lawm lut niin a tarlang.