No Teaching Day hmang dawn

Mizoram Government Aided School Association (MIGASA) chuan, lumpsum grant-in-aid middle school leh high school 62-te adhoc grant-in-aid dinhmuna dah tura sorkar an ngenna tihhlawhtlin phûtin August 9-17, 2018 chhungin 'No Teaching Day' an hmang dawn tih an puang.

MIGASA office bearer-te chu nimin khan Aizawla SSU pisaah an ṭhukhawm a; MIGASA General Assembly-in a lo rel tawh angin, adhoc grant-in-aid-a min hlangkai tura an ngennaah tun thlengin sorkar aṭanga thu lawmawm an la hriat loh avangin lumpsum M/S leh H/S 62-ah August 9-17 chhung sikul kal chunga zirlaite lehkha zirtir loh an rel a ni.

An duh leh beiseite chu tihhlawh­tlinsak ngei tura sorkar an ngen thu sawiin MIGASA chuan, "No Teaching Day hnua thu lawmawm kan la hre lo fo a nih chuan kan kal zel dan tur chu a tlachawpin rêl chawp zel ni se kan ti. General Assembly chuan No Teaching Day-in awmzia a neih loh chuan sikul khâr ni se tih a lo rel tawh a ni," an ti a; an member school-te chu office bearer-te thuchhuak ngaichang zel turin an chah.

MIGASA chuan, kum 1972-a Mizoram union territory a nih aṭangin kum nga dan zelah sorkar hian school upgradation a kalpui ṭhin tih sawiin, "Kan sorkar chak tak hian kum nga mai ni lo, kum 10 an sorkar chhung hian Kolasib-a CZS HSS an provincialised tih loh chu upgrade an nei lo. Pu Lal Thanhawla kaihhruai sorkar hi sorkar chak tak niin kan hria a, sikul 70 emaw lek adhoc-a min hlankai hi an tan thil harsa turah kan ngai lo," an ti.