PAMRA-te ngaihthahah sorkar puh

BJP, Mizoram Pradesh president Prof. JV Hluna chuan, PAMRA-te chu Mizoram tan zalenna sualtu tak tak an nih laiin, sorkarin a ngaihthah hle niin a sawi a, "An phu ngawih ngawih chhawmdawlna pawh MNF sorkar ngei pawhin a pe lo," a ti.

Nimina BJP pisaa inkhawmah Prof. JV Hluna chuan, Union Home minister Rajnath Singh-a Mizorama a lo zin ṭumin Mizoram zalenna sualtute chu Indian Freedom Fighter anga enkawlna pek a, pension thleng pawh a pek ni se, tiin an lo thlen a, Rajnath Singh pawhin thil harsa a nih loh tur thu a sawi niin a sawi a; mahse, Congress sorkarin a bawhzui loh avangin a hlawhlting rih lo niin a sawi a ni.

JV Hluna chuan, Citizenship Bill chungchangah, March 25, 1971 chu Assam Student Union-in citizenship cut-off year atana an demand a nih thu a sawi a, "Sorkarna an siam thleng pawh khan hetah hian an la ding reng. Central sorkarin an hmalakna a pawmpui loh avangin hmalak theih a ni lo a, Assam-a BJP a sorkar veleh missionary zeal-in an tharthawh leh a ni. Mizoramah pawh hian UT a nih khan dan loa lo lutte hi chhui chhuah tura tih ni mah se, hmalakna a awm lo. Kan sorkar hunah chuan hei hi kan hmalakna hmasa tur a ni," a ti.