Sacha Inchi chíng uar turin mipui ngen

Mizo Traditional Herbal Medicine Society (MTHEMS) hruaitute chuan, Sacha Inchi (Starbean) an lei theih thu an puang a; Mizo mipuite chu Sacha Inchi chíng uar turin an ngen.

MTHEMS hian nimin khan Aizawl Press Club-ah thuthar thehdarhtute an kâwm a; an president Lalneihkima chuan, Sacha Inchi chu Mizorama kut hnathawktute tan eizawnna tling leh hlâwk a nih theih thu sawiin, "Buh ṭîn khat hmunah kum khat chhungin Rs. 2,00,000 vel lak luh theihna a ni," a ti.

MTHEMS tarlan danin, Sacha Inchi hi a ṭiak phun chi a ni a, Mizoram khaw hmunah pawh a ṭha duha ngaih a ni. Ram acre khata zauah kûng 500-600 vel phun theih a ni a, phun aṭanga thla ngaah a pár a, thla riatah a rah a lawh theih tawh a, phun kumah a rah vawi khat seng theih niin, a kum hnihna aṭangin vawi hnih seng theih a ni. Kum 35-50 thleng a rah thei.

Kûng khatah a rah kg. 2 vel lawh tur a awm a, kung 500-ah chuan kg. 1,000 vel lawh tur a awm theih tihna a ni. MTHEMS-in Rs. 200-in kg. khat an lei thei a, kg. 1,000 chu Rs. 2,00,000 man a ni. A kum hnihna aṭangin kum khatah vawi hnih lawh theih a nih avangin, a lêtin a hlâwkna a pung dawn tih an sawi.

MTHEMS President chuan, Sacha Inchi ṭiak chu an chah theih thu leh pakhat Rs. 100-a an pek theih thu sawiin, Mizo mipuite chu Sacha Inchi chîng uar turin a chah a, "A lei theitu min dawrtu company pakhat chuan metric ton 30,000 an rawn order a ni. Keini chuan sawngbawl kan tum lo a, a rah pangngai hralh kan tum a, tunah hian kan lei nghal thei a ni," a ti.

Zawhna chhangin Lalneihkima chuan, Sacha Inchi chungchangah hian kum 2001 aṭangin Horticulture department an dawr tawh thu a sawi a, "Mahse, tun thlengin kan la hlawhtling lo," a ti a; Sacha Inchi chu India ramah chuan Kerala-ah an chíng nasa a, Assam leh Meghalaya-ah pawh an chìn ve thu a sawi.