Champhai bawrhsap Maria CT Zuali Chhui phalna sorkarah dil a la ni lo

December 18, 2021 zan dar 8 vela Kelkâng dáia kuhva rah man sa hâl kaihhnawiha Champhai bawrhsap Maria CT Zuali laka thubuai ziah luh bawhzui a la ni lo a, amah chhui phalna Mizoram sorkarah dil a la ni lo.

Sorkar danah chuan judge-te leh district magistrate-te chu an dinhmun leh nihna kaihhnawiha hma an laknaah an lakah thubuai lut pawh ni se, sorkar aṭangin chhui phalna (prosecution sanction) Vigilance department aṭangin lâk hmasak a ngai a ni.

Vanglaini palai zawhna chhangin Champhai Police Station-a officer-in-charge (OC) leh case investigating office (IO) ni bawk Vanlalthanga chuan, district bawrhsap Maria CT Zuali chhui turin Vigilance department-ah prosecution sanction an la dil loh thu a sawi a, "Thil tih zung zung theih a ni lo," a ti.

Hetih lai hian, Champhai DC hi a laka thubuai ziah luh kaihhnawihah police aṭangin thu zawtfiah tura koh emaw, a awmna hmuna kal chilha thu zawhfiah emaw a la ni lo. Maria CT Zuali chuan zawhna chhángin, "December 20, Thawhṭanni khan phone chuan min lo bia," a ti. December 20, 2021 kha FIR thehluh ní a ni.

Tarlan tawh angin, December 18, 2021 (Inrinni) zan khan Champhai DC-in Kelkang dáia kuhva rah a man sa, truck pathum phurh ip 150, cheng nuai 15 vel hû nia sawi chu hâl a ni a, hemi chungchangah hian kuhva neitu nia inchhál Lalhruaitluangi, Chaltlang Lily Veng, Aizawl chuan December 20 khan Champhai Police Station-ah FIR a thehlut a ni. Truck khalhtute phone leh chabi chhuhsak an nih thu a tarlang bawk.

FIR thehluh a nih ní hian Champhai PS officer-in-charge (OC) leh case investigating office (IO) ni bawk Vanlalthanga chuan thubuai a ziak lut nghal a; IPC Section 435 (mi bungraw hâlsak), IPC Section 427 (mi bungrua cheng 50 aia tam man tihchhiatsak) leh IPC Section 341 (dan loa driving license leh mobile phone laksak) tlawhchhanin thubuai a ziak lut a ni.

Dan loa kuhva rah lâk luh leh tihchhiat chungchangah hian pawl 20 chuangin Champhai DC Maria CT Zuali an thlàwp thu an puang tawh a ni.

Thu dawn danin, dan loa Myanmar aṭanga Mizorama kuhva lak luh leh sumdawn chu Mizoram sorkarin a khap mek a ni a, kum 2019 aṭangin khap ṭan a ni.