RAT & RT-PCR test kit 95,95,527 Mizoram sorkarin a dawng/lei tawh

Mizoram sorkara Health & Family Welfare department-in November 2021 thlenga Covid-19 swab sample endikna hmanrua, RT-PCR test kit leh Rapid Antigen Test (RAT) kit a dawn leh lei tawh zawng zawng chu 95,95,527 a ni a, chu'ng zinga 95,29,425 chu lei niin, 66,102 chu a thlawna dawn a ni.

Swab sample endikna hmanrua hmuh dan chungchang hi Right to Information Act hmanga zawh niin, September 30, 2021 khan dilna thehlut a ni a, HFW department hnuai péng hrang hrang aṭangin November 26 leh November 30-ah chhanna hmuh a ni.

Sample test kit-te chu Direc­torate of Health Services (DHS), Directorate of Hospital & Medical Education (DHME), Zoram Medical College (ZMC) leh National Health Mission (NHM)-te'n an lei leh dawnte a ni a; sorkar sum hmanga an leina (supplier) chu SD Biosensor Healthcare Pvt.Ltd., Manesar Gururam, Haryana a ni.

RAT kit lei dan chu - DHS-in supplier SD Biosensor, Gurugram aṭangin kum 2020 aṭanga zawhna chhan lai thlengin 95,08,605 lei a ni tawh a, NHM-in an Covid fund hmangin SD Biosensor aṭang thoin August 12, 2020 (ni 10 chhungin)-ah 10,000 an lei. NHM vek hian SD Biosensor aṭang vêkin November 2, 2020 (ni 10-12 chhung) 10,820 an lei a, North Eastern Council (NEC) aṭanga sum hmuh hmanga lei a ni. DHME leh ZMC ten RAT kit an lei lo.

RAT kit supply-tu thlan dan, tender chungchang, chanchinbua chhuah dan a kaihhnawih dangte zawhna chhangin HFW department SPIO chuan, "NHM hnuaia RAT kit supply hi Purchase Committee, Mizoram State Health Society, NHM kaltlanga thlan a ni e. NHM Covid Fund Purchase Committee, MSHS dt 11.08.2020-a ṭhukhawmin a rêl angin ICMR, Govt of India aṭanga lehkha dawn angin, India rama a siamtu awmchhun SD Biosensor aṭangin lei a ni," a ti. "NEC Fund – Purchase Committee MSHS Dt 29.10.2020-a ṭhukhawmin a rêl angin ‘Rate Adoption’ hmangin SD Biosensor hnen aṭangin lei a ni,” a ti bawk.

SD Biosensor hi India rama RAT kit siamtu awmchhun anga tarlan a nih laiin, Indian Council of Medical Research (ICMR)-in August 14, 2020-a 'List of companies/vendors of Rapid Antigen Test kits for Covid-19 validated/being validated by ICMR' a tihchhuahah chuan SD Biosensor bakah, company dang hming eng emaw zat tarlan a ni thung.

Health Services SPIO chuan, kum 2020-2021 chhunga RAT kit leite chu restricted tender leh rate adoption (DPAB recommendation) hmanga lei a nih thu a tarlang a, "Kum 2021-2022 (October 2021 thleng) chhunga leite hi open tender (rate contract) hmanga lei a ni," a ti. Open tender hmanga chhuahna chanchinbu copy thil tel a ni.

Mizoram sorkarin RAT kit leh RT-PCR test kit eng emaw zat a thlawnin a dawng a, a vaiin 66,102 a ni. RAT kit leh RT-PCR test kit a thlawna dawn dan chu - DHME-in Hardonian’s aṭangin RAT kit 15,850 a dawng a; ZMC-in RT-PCR test kit ICMR (Pune depot) aṭangin 500, ICMR (Delhi) aṭangin 25,000 leh ICMR (GMC) aṭangin 24,752 a dawng bawk.