Aizawl DC dawr dan tur tichhuak

Aizawl DC Dr Lal­hriatzuali Ralte chuan, December 17, 2021-a Aizawl Bawrhsap Pisapui a kan chhiat hmaa arms license, explosive NOC leh lehkha pawimawh thehluh tawh leh buaipui mek neitute chu January 9, 2022 aṭangin a theih chin chinah email id: dcofficeaizawl@gmail.com emaw, whatsapp kaltlangin 8014630555-ah emaw inhriattir turin a ngen.

Aizawl Bawrhsap chuan, Aizawl DC pisa thar awmna hmun tur buatsaih a nih chhungin Treasury Square-a DC Office hmunhma pangngaiah a theih ang anga an inbenbel thu a tarlang a, "Office hnathawh, khawlte leh hmanruate lam khawm mek a nih avangin January 5 aṭanga ni hnih/thum hnuah DC Office chu mipui dàwr theih tura buatsaih a ni," a ti.

Ṭul bik (emergency) thil emaw, lehkha thehluh tur nei emaw chuan dcofficeaizawl@gmail.com emaw, Aizawl SP pisaa DC ṭhut lailawknaah emaw, DC pisaa Sub-Divisional Officer (Sadar) emaw District Emergency Operational Centre (DEOC) phone number 9436453580-te biak leh pan theih a nih thu a tarlang bawk.