PPE ṭhui man cheng nuai 168 la bá Bá ; pek theih hun tur hriat a ni lo

Mizoram sorkarin September 2021 aṭanga tualchhunga puan ṭhuitute hnena personal protective equipment (PPE) 28,000 a ṭhuitirna, hmarua leina leh a kaihhnawihah cheng nuai 168 a la bá a, bá pek theih hun tur hriat a la ni lo.

Tarlan tawh ṭhin angin, June 2021-a State Disaster Management Authority hnuaia State Executive Committee (SEC) ṭhukhawm chuan ram páwn aṭanga PPE lei loin, tualchhunga ṭhuite hman an rel a; chumi bawhzui tur chuan Commerce & Industries department an ruat a ni.

A tirah puan ṭhui thiam­te chu PPE 36,000 ṭhui­tir niin, State Disaster Res­ponse Fund (SDRF) aṭangin ṭhui man pek a ni a; a hnuah 28,000 ṭhui­tir leh niin, senso chu Mizoram sorkar sum aṭanga pek tur a ni thung.

PPE pakhat Rs 150 zelin puan ṭhuitute'n an ṭhui a, PPE hmanruate chu tualchhung industry-te'n an supply ṭhin bawk.

Thu dawn danin, Mizoram sorkar chuan Sept. 2021 khan a báin Aizawl veng hrang hranga puan ṭhui thiam mi 500 vel chu PPE 14,000 a ṭhuitir a, PPE indaih lohna a nasat avangin tualchhunga industry pahnih chu PPE 14,000 dang a ṭhuitir bawk. PPE ṭhuitirna, hmanraw leina leh a kaihhnawih danga senso cheng nuai 168 vel chu nimin thleng khan sorkarin a la pe lo a ni.