Health Minister leh CYMA OB inkâwm

Nimin khan Health & Family Welfare minister Dr R Lalthangliana chuan a pisaah Central YMA office bearer-te a kâwm a, Covid-19 chungchanga hmalak zel dan tur a sawipui.

Health Minister leh CYMA office bearer-te hian Covid-19 donaa sorkar, YMA leh tlawmngai pawl dangte thawhho zel dan tur te, Covid chi thar Omicron thleng thei chungchanga inruahman dan tur te, task force-te tihnun thar leh a ṭul thu te, media hmanga uar zawka mipui zirtir a ṭul thu te, Covid-19 vei damlo enkawl dan te, hripui thawh thumna thleng thei atana fimkhur a ṭul thute leh thâ thlah loa ṭan tlat a pawimawh dante an sawiho a ni.

Central YMA hruaitute chuan, sorkarin YMA General Conference hman phalsak mai ni loin, ruahmanna him leh felfai tak a siamsak avanga an lawm thu Health Minister an hrilh.

Nimin vêk khan Health Minister hian Aizawl City Local Council Association office bearer-te a kâwm bawk a; hripui laka Mizoram dinhmun an thlir bakah, hmalakna tur an sawiho. Minister hi Health & Family Welfare Board vice chairman Dr ZR Thiamsanga, MLA-in a ṭawiawm a ni.