KHAWTHLIR

Thisen pe
KṬP, Lengpui Model Branch chuan nimin khan an kohhran hall-ah thisen pek huaihawtin, Aizawl Civil Hospital tan thisen unit 60 an pe a, petute mipa 53 leh hmeichhia pasarih an ni.

Bible application
Victorial Mizo Kohhran, Australia bul tuma siam Mizo King James Bible application chu nimin khan F Kapsanga, Tuikual South-in an inah a tlangzarh. Application hi Lailen Consulting Firm buatsaih a ni a, USA-a IPhone siamtu Apple company-in khawvel puma hman theihna permission a pe tawh. Bible apps hi a thlàwnin download theih a ni.

Containment zone
Kawlkulh khuaah Covid-19 vei hmuh chhuah an tam avang leh hri darh zel tur ven nan Khawzawl additional DC Lalrohlua chuan nimin khan Kawlkulh khaw chhunga hmun 10-ah micro containment zone a puang.

Covid vaccine dose 13,21,577 pe tawh
January 4, Thawhlehni tlai thleng khan Mizoramah Covid-19 vaccine dose 13,21,577 pek a ni tawh a, dose khatna 7,31,325 leh dose hnihna 5,90,252 a ni. Vaccine pek tur zat ruahman zinga 94.35% hnenah dose khatna pek a ni tawh. Thawhlehni bikah Covid-19 vaccine dose 1,263 pek a ni a, dose khatna 485 leh dose hnihna 778 a ni. Health department-in Mizorama kum 18 chung lam Covid-19 vaccine pek tura a chhût zat chu mi 7,75,105 an ni a, mi 7,31,325 hnenah pek tawh niin, chu chu pek tur zat aṭangin 94.35% a tling.

Minister-in tlawh
Minister of state Robert Romawia Royte chuan January 4, Thawhlehni khan department a enkawl pathum - Information & Communication Technology, Tourism leh Sports & Youth Services directorate-te bakah, Mizoram State Sports Council pisa a tlawh a, thawktute kum thar chibai a bûk. Robert Romawia chuan, department tihlen chiam aiin thawh chhuah len a pawimawh zawk thu sawiin, "Sorkar phurrit siam lo záwnga ruahmanna siam a ṭul,“ a ti.