Thenzawl Wellness Centre hawn a ni

Thenzawla Wellness Centre din thar chu nimin khan Tourism minister Robert Romawia Royte-in a hawng a; Vantawng Khawhthla chu Northeast Mega Tourism hnuaia tihhmasawn tura thlan a nih thu a sawi.

Hawnna inkhawm hi Tourism director V Lalengmawia'n a kaihruai a; Robert Romawia chuan, Tourism department chu department lian lo tak ni mah se, hmalakna hmuh theih tawh leh hmuh theiha awm mai tur eng emaw zat an neih thu a sawi.

Tourism Minister chuan, Vantawng Khawhthla chu Northeast Mega Tourism hnuaia tihhmasawn tura thlan a nih thu leh Thenzawlah tourist auditorium hawn mai tura peih a nih tawh thute a sawi a; Covid-19 dinhmun a ziaawm chuan February thlaah Ministry of Tourism bultumin Thenzawl Golf Course-ah golf tournament buatsaih tum a nih thu a sawi bawk.

Robert Romawia Royte chuan, Reiek tlang thuam ṭhatna turin DoNER aṭangin cheng nuai 560 hmuh a nih thu te, Berawtlang tihchangtlun nana Special Assistance to State for Infrastructure Development aṭangin nuai 600 hmuh a nih thu te, 15th Finance Commission hnuaiah Mizoram tourism tihhmasawnna tur cheng vbc. 200 dah a nih thute a sawi a, "15th Finance sum hi chu hripui avangin kan beisei ang zat kan hmu lo mai thei a, kan ngaih pawimawh zualte erawh kan hmuh ngei beisei a ni," a ti.

Tourism Minister chuan, Khamrang village based eco tourism atan DoNER aṭangin cheng nuai 800 hmuh a nih thu te, External Aided Fund aṭangin cheng nuai 1,00,000 an beisei mek thu a sawi bawk.

Thenzawl Wellness Centre-ah hian spa leh massage room, cafeteria leh riah chilh duh tan eco-log hut pariat a awm a, a sak nan Siberian Pinewood vek hman a ni.