Sorkar laipuiin minority-te chawi kân a tum - BJP Minority Development

Central BJP Minority Development member (Mizoram changtu) Elizabeth Nongbri chuan nimin khan Aizawl Press Club-ah thuthar thehdarhtute a kâwm a; sorkar laipuiin hnam hnuaihnung leh tlem zawk (minority)-te chawi kân tuma hma a lak thu a sawi.

Elizabeth Nongbri chuan, India ram pumah prime minister Jawaharlal Nehru aṭanga Narendra Modi thlengin sorkarin minority-te chawi kân tumin hma a la tih a sawi a, "Nimahsela, state sorkarin a ngaihtuah tâwk loh leh scheme leh programme pawisain sanction chhante a thlen ṭhat tâwk loh avangin hlawhtlinna hmel a la lang lo. Tuna hmarchhak state hrang hranga sorkarna chelhtu leh mipuite'n politics 2022 agenda bul ṭanna atan neih a ṭul a ni," a ti.

Ministry of Minorities bakah hmarchhak state-te hmasawnna tura DoNER, NEC, NEDFI, NE Handigraft & Handloom Corporation, etc.-te hnena sum pek theih dante zir chiangin, hmasawnna tura beihpui thlak a ṭul thu sawiin Nongbri chuan, "NE Culture & Society, mipui kut themthiam dante zir chiangin, NE Tribals & Minority-te kut themthiamna chu fel taka training ṭha kalpui a ngai," a ti a; mi tin bul ṭanna thlenga ngaihtuah turin central ministry, corporation leh financial institution-te an inhawn thu a sawi.

Elizabeth Nongbri chuan, mi tin hnathawk tura inthununna leh taimakna hmanga hma lam pan a, hmasawn tumna rilru neih hmasaka employment siama entrepreneurship lam pho chhuah tam a ngaih thu sawiin, "Keini BJP chuan uluk takin NE state, Mizoram chhunga minority-te dinhmun uluk takin kan zir a, hmasawnna thlentir ngei kan tum a ni," a ti bawk.