Hripui vei hmuh chhuah thar zingah State páwn aṭanga lut hlim 26 an tel

January 4, Thawhlehni khan Mizoramah Covid-19 vei mi 443 hmuh chhuah a ni a, an zingah state páwn aṭanga rawn lut mi 26 an tel. Nimin khan hripui vei dam tawh mi 91 chhuahtir an ni a, hripui vanga thi an awm lo.

Covid-19 vei hmuh tharte chu mipa 217 leh hmeichhia 226 an ni a; ZMC laboratory-a hmuh chhuah 41, TrueNAT hmanga hmuh 39, RAT hmanga hmuh 356 leh Fluorescent Immunoassay (FIA) hmanga hmuh pasarih an ni. Swab sample endik zat aṭanga hripui vei hmuh zat chu 13.38% a tling.

Sorkar thuchhuah tarlan danin, Covid-19 positive hmuh thar mi 443 zingah state páwn aṭanga rawn lut hlim min 26 an tel a; an zinga mi 21 chu BSF sipaite niin, mi panga chu tualchhung mi Delhi leh Kolkata aṭanga zin haw, Lengpui Airport-a hmuh chhuah an ni.

IDSP record angin, Mizoramah Covid-19 vei 1,42,691 hmuh chhuah a ni tawh a, mipa 68,704 leh hmeichhia 73,987 an ni. Nimin tlai dar 5 thleng khan mi 1,40,067 (98.16%) chhuahtir an ni tawh a, mi 553 (0.39%) thi tawhin, enkawl mek mi 2,071 (1.45%) an awm.

January 4, Thawhlehnia Covid-19 vei hmuh thar mi 443 zingah symptom nei mi 304 awmin, 68.62% a tling a, mi 139 erawh chu symptom nei lo an ni thung.

Thawhlehnia swab sample endikna district 11 zingah positivity percentage 10% aia a sànna district pasarih a awm a, a sànna ber Serchhip district-ah 29.83% a tling. Positivity rate 10% chung lam district dangte chu Aizawl 16.07%, Khawzawl 13.61%, Saitual 12.57%, Champhai 12.30%, Lawngtlai 12.19% leh Mamit 10.76%-te a ni.

Serchhip district-a East Lungdarah hripui vei mi 47 hmuh belh niin, symptom nei deuh vek an ni a; January 3 khan mi 26 hmuh a lo ni tawh. Serchhip district-a Sialsir khuaah mi 31, symptom nei vek leh Sailulâk khuaah mi 21, symptom nei deuh vek hmuh chhuah a ni bawk.

IDSP tarlan danin, nimin tlai dar 5 thleng khan hripui vei dam tawh mi 91 chhuahtir an ni a; district tina chhuak zat chu - Khawzawlah 22, Saitualah 17, Aizawlah 16, Lungleiah 15, Mamitah 11, Champhaiah panga, Serchhipah pathum leh, Kolasib leh Hnahthialah pakhat ve ve a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,42,691 chu mi 1,000 zelah hripui vei mi 130 an awm ang a ni a; mi 1,00,000 zela Covid-19 vangin mi 50 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 21, 2021 thlenga swab sample endik tawh 15,14,995 aṭanga RT-PCR hmanga endik zat percentage chu 21.82 a ni a, RAT hmanga endik zat chu 72.34% a tling.