Mizorama lei dawhte a hunah zo dawn lo ; Thubuai vangin PWD-in nuai 120 chuang séng

Central Road Fund leh leh NABARD aṭanga sum hmuh hmanga Mizoram PWD enkawlna hnuaia Mizorama lei (bridge) dawhte chu PWD leh contractor-te'n hna thawh hmaa inremnaa zawh hun tura tihah an zo hman dawn lo vek. Lei dawhtu pakhat, PWD-in hna a tihtawpsak vanga Court-a thubuaiah PWD chuan cheng nuai 120 chuang an sêng tawh a; zángnadawmna phût vanga lei dawh zûzî ta a awm bawk.

PWD hotute sawi danin, Mizoramah Central Road Fund sum hmanga lei dawh mek pahnih leh NABARD sum hmanga lei dawh mek panga a awm a; chu'ng zinga paruk chu Sadguru Engineers & Allied Services Pvt.Ltd. dawh niin, pakhat chu Sunshine Overseas Infrastructure an thawh a ni.

Mizoram, PWD hotute chuan, contractor hrang hrangte chu dân angin a tirah hna thawh zawh hun turte ziah vek a ni a, chutih laiin, chhan hrang hrang vangin zawh hun tura tihah zawh hman a ni lo ṭhin tih an sawi.

PWD hotute chuan, "Ṭhenkhat chu thawktu lama harsatna vang te, khuarêl chhiatna vang te, hmanraw lâk luhnaa buai vang te, design drawing thlak ngaih vang te, hna thawhna hmun kawngah leh ramah buaina a awm vang te, bandh neih vangte leh chhan dang dang vangin an thawh hun chhung loh theih loha pawhseisak ngai an awm ṭhin," an ti.

Contractor-te hnathawh chu hun tiama an zawh loh a, a chhan pawm tlak a awm loh chuan inremnaah hrem theih an nih thu leh hrem dan turte a awm thu sawiin, PWD hotute chuan, chutiangah chuan contractor-in ex-gratia basis hmangin pawhsei a dil thei a, mahse, hna a thawh rei vangin a hna chu rate ngai hman a ngai thung tih an sawi.

PWD hotute sawi danin, PWD enkawl hna thawktu contractor zingah hna tihtawpsak an awm tawh ṭhin a; chutianga hna tihrtawpsak a awm chángin Mizo contractor-teah buaina a awm zui vak loh laiin, vai contractor-te chuan Court-ah PWD khin an chíng a, Court-a thubuai vangin PWD-in cheng nuai 120 chuang an seng tawh.

PWD chief engineer (Highways) K Lalsawmvela chuan, kum 2005-ah Aizawl-Lunglei World Bank road siamtu Bhageeratha Engineering chu an hna tihtawpsak vangin Court-ah an kal thu sawiin, "A tirah Guwahati High Court, Aizawl Bench-ah an kal a, a hnuah Dispute Resolution Board-ah an kal leh a, Arbitration Tribunal-ah an kal leh a, an hlawhchham vek. Henga an kal avang hian ukil kan rawihna te, PWD thawktute kan chêt velna te, arbitration fee zawng zawng nen cheng nuai 120 kan sêng a ni," a ti.

K Lalsawmvela chuan, PWD hnuaia hna thawhah ram neitute'n zángnadawmna an beisei vangin hna chawlhsan a awm fo tih sawiin, Kaladan Multi Modal Transit Transport Project-ah pawh zangnadawmna phût vangin harsatna an tawh mek thu a sawi a, "Ram neitute bandh vangin ni 345 (316+1+4+24 = 345) zet hna thawh chawlhsan a ni tawh. Bandh a nih reng rengin skilled labour leh unskilled labour-te'n an hlauh avangin an haw vek ṭhin a, hna a tikhaihlak nasa ṭhin hle," a ti.