ZPM-in Street Campaign an buatsaih

Ṭangrual pawl, Zoram Peoples' Movement (ZPM) ṭhalaite chuan August 4, Inrinni khan nilengin Aizawlah Street Campaign an buatsaih a, hmun 10-ah vantlang inkhawm neiin, ZPM hruaitute'n thu an sawi.

ZPM ṭhalai Street Campaign-ah hian thu­pui chu 'Zoram chhan­chhuahna' tih a ni a; ZPM secretary general K Sapdanga, spokeperson PL Liandinga leh ZPM ṭhalai president Lalmuanpuia Punte ten thu an sawi a ni.

Street Campaign an neih chungchangah hian ZPM ṭhalai chuan thuchhuah siamin, Mizoram chu Pathianin Mizote hnena a pek a ni tih an tarlang a, "Chutih laiin, kan ram hruaitute'n Kristianna lem changa hmangin ram an hruai a, uchuak taka mahni inhâi vûrin rorelna dawhkânah an thu a ni. A ṭhente phei chuan thubuai an neih phah a, man tâwkte pawh an awm hial a ni," an ti a; ram hmasawn dan a muang hle tih an sawi.

ZPM ṭhalai chuan, politician-te'n politics-ah sakhuana an lantir ngam tawh lo a, mahni sahmîm hnawh puar an duh luat vangin politics ṭha loah mipui an inbarh lut mek tih sawiin, "Kan sakhua pawh politics vangin a him ta lo a, politics ṭha loin kan sakhua a luh­chilh a, biak bûka kan luhpuite chuan kan sa­khaw tihchimih duhtute an thawhpui ta a ni," an ti.

Mizoram sorkar kal mek leh kal tawhteah kut hnathawktute tan hamṭhatna a awm lo tih sawiin ZPM hruaitute chuan, "A thlawna sum sem vangin mi tam tak thinlung a khawloh phah a, mahni intodelhna lama kaihhruaina kawng siam loin vote zawnna atan a thlawna sum sem kan intihhmuh ta hi a manganthlak tak zet a ni," an ti a; ram hruaitute'n ram an hruai dan chu a manganthlak a, mipui an rûm a, ram leh mipui chhanchhuah an ngaih tâk thu leh ramin kalphung thara rorel a mamawh thu an sawi bawk.