NCR-a chuang lo Assam aṭanga luh tumte Dang turin MZP-in Mizoram sorkar an phût

Assam sorkarin National Register of Citizens (NRC) list a tihchhuah taka tel lo Assam state chhunga cheng mi nuai 40 chuangte chu an ṭhenawm state-ah an luh mek avangin MZP chuan, Mizoram sorkar chu Assam aṭanga dan loa Mizorama luh tumte dang turin an phût a; Mizoram sorkarin hma a lak loh chuan MZP-in hma an lak dawn thu an puang.

MZP hruaitute hian August 4, Inrinni khan Aizawl Press Club-ah thuthar thehdarhtute an kâwm a; MZP president L Ramdinliana Renthlei chuan, Assam sorkarin July 30, 2018-a NRC final draft a tihchhuaha tel lo mi nuai 40 chuangte chuan an state ṭhenawmah luhna tur an zawng tih sawiin, "Mizoram pawh Assam ṭhenawm kan nih avangin Mizoramah eng emaw zat an lo lut ngei tura ngaih a ni," a ti.

L Ramdinliana chuan, Assam aṭanga tlanchhiate an state-a an luh loh nan Assam ṭhenawm state dangte chuan ṭan an lak mek thu sawiin, "Mizoram hi kan muthlu bik ang tih kan hlau a. Assam-in NRC final draft a tihchhuah hnuah state ṭhenawm sorkarte chu invêng lâwkin, nasa takin hma an la a, chutih laia Mizoram sorkar a ngawi reng mai hi kan hrethiam lo hle," a ti a; Assam leh Mizoram inrinaah hian police force dah belh turin sorkar an ngen tih a sawi.

Assam aṭanga Mizorama luh tum ILP dil an awm chuan, NRC-a chuang lo chu ILP pe lo turin sorkar thuneitute an ngen tih sawiin Ramdinliana Renthlei chuan, Mizorama hnam dangte pawh uluk lehzuala enfiah turin sorkar an phût bawk tih a sawi a, "August 15t, 2018 ral hmaa Mizoram sorkarin hmalakna a nei lo a nih chuan, a ṭul dan ang zelin MZP-in checkgate siamin hma a la dawn a ni," a ti.

Accord ziah a nih hnuah pawh Assam sorkarin hma an lak tak tak loh avangin mi ṭhahnemngaite'n kum 2006-ah Supreme Court-ah thu an thehlut a, Supreme Court chuan kum 2014-ah NRC chu ti thar (update) turin a ti ta a ni.

Assam-ah BJP-in sorkarna an chan hnuah, inthlan dawna an intiam angin NRC chu buaipui a ni ta a, kum 1971-a Assam-a awm hmante leh an thlahte chu Assam khua leh tuia chhiar niin, 1971 hnu lama awmte chu NCR-ah telh an ni lo. NCR final draft chu July 30, 2018-ah tihchhuah a ni a; NCR final draft-ah chuan Assam-a cheng si, mi nuai 40 chuang chu NCR-ah an tel ve ta lo.

MZP President chuan, NCR-a chuang lo mi nuai 40 chuang zinga tam tak chuan Assam an chhuahsan mek tih sawiin, "Assam ṭhenawm state - Megalaya, Tripura, Nagaland, Arunachal Pradesh, Manipur leh Mizoramahte an tlan khawm mek nia hriat a ni," a ti. Meghalaya-ah chuan Khasi students Union-in Assam nena an inrinaah Infiltration Gate siamin, Meghalaya-a luh tum mi eng emaw zat an man tawh a; Nagaland-ah chuan sorkar hmalaknain an state-a luh tumte uluk takin an enfiah nghal tih a sawi bawk.

MZP President sawi danin, Assam sorkar chuan kum 1951-ah NRC a nei tawh a, kum 1979-ah bye-election dawnah electoral roll-ah mi an pun vak avangin All Assam Students Union (AASU)-in dan loa Bangladesh aṭanga pém lutte vangah ngaiin an dodal ṭan. Kum 1985-ah AASU leh India sorkarin Assam Accord an ziak a; Accord-ah chuan dan loa pém lutte hnawh chhuah a tel.