NLUP sem a ni zel dawn - Congress party

Congress party chuan Inrinni khan thuchhuah siamin, NLUP chu sem zel a ni dawn tih an tarlang a; Gauhati High Court-in chawlhkar li chhung sem rih lo tura a tih vanga mangang lo turin mipui an chah.

MPCC thuchhuah chuan, "MNF party-te'n NLUP kumin a sem tur hnuhnung ber 'stay' anga an sawi hi High Court-in NLUP chungchang hi kar li hnua ngaihtuah leh huna chinfel mai theih tur a nih avangin NLUP hi sem chhunzawm a ni thuai dawn a, Mizoram hmun hrang hranga NLUP dawng tura thlan miretheite lo lungngai lo tur leh chî-âi lo turin kan chah a ni," an ti.

Congress party chuan, tuin emaw Gauhati High Court-a NLUP dawngtu tur thlan dan dik lo leh thlan dan tur guidelines awm lo angin Mizoram sorkar an hêk vanga NLUP ṭanpuina sem tur tihkhawtlai a ni chu pawi an tih thu an tarlang a; Congress sorkar tihmualpho tumna leh sorkar hmai tihmâwk tumna biru tak a awm ngei sawiin, chumi avang chuan pawi an tih leh zual thu an sawi.

NLUP dawng tur thlan danah a tirah kalpui dan tur duan vek a nih thu sawiin MPCC chuan, chu chu NLUP Manual tia vuah niin, internet-ah pawh hmuh mai tur a awm niin an sawi a, "Guidelines awm reng chung sia sorkar hêktuin guidelines awm lo ang leh NLUP ṭanpuina sem chungchangah thil langtlang lo a awm ni âwm taka High Court a hrilh hi a vanduaithlak hle," an ti.

MPCC tarlan danin, NLUP dawng thei tur guidelines-a ziah angin NLUP kalpui hma aṭangin Central YMA bultumin khua leh veng tinah chhungkua zir chian a ni a, rokhawlhna eng emaw vangin CYMA a tel zui lo. A hnu­ah Mizoram University-in NLUP dawng thei tur endikna an kalpui ve leh a; chhungkaw list chu NLUP Implementing Board office-a thehluh a ni. Chutih laiin, a tìra NLUP dawng thei tur list-a awm lo, indan vang leh pêm thar tam tak an awm bawk.

NLUP guidelines-ah chuan, sorkar hnathawk awmna chhung­kua te, eizawnna ngêlnghet nei, sumdawnna leh huan lo nghet neite'n NLUP an dawng thei lo a; NLUP third phase leh fourth phase-a dawng tur thlante zingah guidelines-in dawng thei lo tur tia a sawi an awm a, chutiangte chu paih zel an ni. Dawng thei tur si, dawng tura thlan âwm hliah hliah dawng lo report a awm pawhin finfiah hnuah telh leh an ni ṭhin.

Congress party chuan, NLUP chu mi retheite din chhuahna tur nia sawiin, opposition-te'n tih a lang chiang hle niin an sawi a, "Mahse, Pathian lam ṭang programme a nih avangin an hêknate hian awmzia a nei ngai lo. Tuna hêkna pawh hi awlsam taka chinfel tur a nih avangin, mi harsate tana programme kalpui hi Pathianin tihtawp a phalin kan a ring lo," an ti.