KHAWTHLIR

Jubilee lawm tan
Armed Veng Branch YMA chuan August 3, 2018 zan aṭang khan an kum 50-na, golden jubilee tlin an lawm ṭan a, jubilee lawmna hi branch secretary hmasa ber CR Nghinglova'n a hawng. Armed Veng Branch YMA hi August 3, 1968-ah din a ni a, din a nih aṭangin office bearer 62 an awm tawh. Jubilee hi August 3, 2019 thleng kawng hrang hrangin an lawm dawn a ni.

Thisen pe
August 4, Inrinni khan Hnahthial North bial ṬKP-in Lunglei Civil Hospital tan thisen unit 47 an pe a, LIKBK Central Ṭhalai Pawl-in Lawngtlai District Hospital tan thisen unit 39 an pe. Dawrpui Vengthar Branch KṬP-in Synod Hospital tan thisen unit 30 an pe a, Catholic Ṭhalai Pawl Holy Cross Parish-te'n Champhai District Hospital-ah unit 15 an pe. Aizawl Civil Hospital-ah Chawlhhmun Bial PYD (NEI)-in unit 23 leh Mizoram Chakma Student Union-in unit 8 an pe bawk.

Hnatlang
August 4, 2018 khan YMA Leitan Branch chuan Leitan leh Bawngkawn inkar kawng dung thenfai hnatlang an nei a, tibawlhhlawhtu ni lo turin mipui an ngen. Durtlang Leitan Local Council, YMA, MHIP; MUP Leitan Branch te leh Leitan Ramthar branch aṭangin MUP leh MHIP branch Joint Committee chuan helai chho hi zu leh ruihhlo tih nan hmang tawh lo turin mipui an ngen a, tilui an awm chuan khauh taka hmalak an tum.

Hmanrua sem
New Economic Development Policy (NEDP) sum hmanga lei puanṭhui kháwl leh mistiri bungrua chu July 4, Inrinni khan Champhai North bialtu MLA TT Zothansanga'n a bial chhunga kut hnathawktute hnenah a sem. Puanṭhui khawl chu mi 38 hnenah pek a ni a, mistirti bungrua chu mi 20 hnenah pek a ni.

Tlan theih
Traffic SP chuan thupek chhuahin, ni 23.7.2018-a thupek a chhuah Electric Veng kawng (church road) a SIPMIU-in sewarage pipe an phum avanga kawngpui laihchhiat siamṭhat hna PWD Aizawl Road North Division ten an thawh hun chhung (25.7.2018 - 31.8.2018) lirthei tlan phal loh tih thupek lo chhuah tawh chu, hnathawh chawlh lailawk anih avangin thu leh awm hma chu ni 4.8.2018 aṭang hian lirthei tlan dan pangngaiin tlan leh theih a nih thu a tarlang.