BNLF leh BLFM hel hluite'n páwl an din

BNLF leh BLFM hel pawla tel ṭhinte chuan tun hnai khan pawl thar dinin, Mizoram Bru Returnees Peace Accords Implementing Demand Committee (MBRPAIDC) an din a; thuchhuah siamin, an din chhan leh an thil duhte an tarlang.

MBRPAIDC chuan, July 31, 2018-a an inhmuh khawmnaah April 26, 2005-a Mizoram sor­kar leh BNLF-te inremna thuthlung chungchang an ngaihtuah tih sawiin, "Agreement sign a nih hnu kum 13 a liam hnuah pawh vawiin thlenga tihhlawhtlin a ni lo hi a pawi kan ti tak zet a; inremna a taka tihhlawhtlin a nih theih nan leh Mizorama Bru-te leh refugee-te harsatna sutkian a nih theih nan MBRPAIDC din a ni," an ti.

MBRPAIDC hruai­tute chu - chairman-ah Surjyamani Reang, BNLF hruai­tu hlui; vice chairman Lalrinkima Molshoy, BLFM hruaitu hlui; general secretary Bruto Meska, BNLF hruaitu hlui; assistant secretary Chandramoni Molshoy, BNLF hruaitu hlui; treasurer Indiaraj Apeto, BLFM hruaitu hlui leh, finance secretary Lalduhawma, BLFM hruai­tu hluite an ni.

MBRPAIDC hmalak tumnate
1. Bru-te tana pek tawh Special Development Project a taka kalpui.
2. MoU angin Bru refugee Mizorama kîrte grouping village-a chhungkaw 500 aia tlem loa khaw khata dah.
3. Refugee-te pawisa dawn tur ṭum khata pek.
4. Refugee kîr tawhte tuna refugee ho dawn tur zat ṭanpuina pek. Kum 1997 buaina vanga tuar chhungte hnenah ṭanpuina pawisa (cash assistance) pek.
5. BNLF leh BLFM ni ṭhin chhungte refugee camp aṭanga chhuak an nih angin tuna an dawn tur ang dawntir ve.
6. Central leh state sorkara hnam hnufual nihna angin Bru-te tan sorkar hna lakah special consideration pek.