Minister-in SHG-te hmalakna a enfiah

Self help group (SHG) Durtlang Area Level Federation (DALF)-te'n leiṭha an siamna hmun chu August 4, Inrinni khan UDPA minister Zodintluanga'n a tlawh a, an hmalak dan a enfiah.

DALF SHG member-te nen an inkawmnaah Zodintluanga chuan, India ramah SHG a ṭhan nasat thu sawiin, "Mizoramah duh angin SHG hian hma a sawn chak lo. SHG hlawhtling tak tak nei ila, ramin hma sawn phah dawn a, a member-te pawhin eizawnna ṭha tak an nei thei dawn a ni," a ti.

UDPA Minister chuan, DALF SHG-te hmalakna fakin, "SHG ṭha tak din tur chuan thawhhona ṭha leh inpawh tlân a pawimawh," a ti a; hlawhtlinna tam zawk hmuh thei tura ṭan la zel turin DALF member-te a chah.

DALF hi group 19-ah an inṭhen a, member 190 vel an awm. Leiṭha siamna hmun pahnihah an neih bakah, lehkha hmangin bag (ip) an siam a, an veng chhung in tinah polythene ṭhat lohzia inzirtirna atan a thlawna sem an tum a ni.