Sorkarin a hnathawkte hlawh a puk laiin party mite contract an pe reng - MPCC

MPCC Media chairman Dr Lallianchhunga chuan, MNF sorkarin sorkar hnathawk hlawh thla thum chhung pûksak a tum chu June aṭangin kalpui ṭan a nih thu a sawi a, "Sorkar hnathawk hlawh pek kim loh aṭang hian thla tin MNF sorkar hian cheng vbc. 30 zel, thla thum chhungin vbc. 90 a hum thei dawn tih sorkar thuchhuakin a tarlang," a ti.

Sorkar hnathawkte hlawh bat a nih laiin party mite tan contract cheng vaibelchhhe tam tak pek chhuah a nih thu sawiin Lallianchhunga chuan, "RTI Act chhanna aṭanga a lan danin, inkhàrkhip lai, May aṭanga June 23 thleng khan Mizoram State Sports Council (MSSC) hnuaiah ringawt pawh cheng nuai 825 man pek chhuah a ni," a ti a, chu'ng contract hnate chu hmanhmawhthlak a ni lo vek tih a sawi.

MPCC Media Chairman chuan, MSSC hnuaia hna pekte chu a thawktu tur ruahman sa vek, restricted tender hmang­a pek a nih thu sawiin, "MNF sorkarin sum harsatna chhuanlama sorkar hnathawkte hlawh a pek kim theih loh laia 'fair' lo taka vaibelchhe tam tak man hna inpek awm reng hi kan hrethiam thei lo," a ti.

Dr Lallianchhunga chuan, "Sorkar hnathawk hlawh an pûk hi AMC leh LC/VC inthlan kan hmachhawn tur atana party mite contract inpekna atan mai mai a nih phei chuan a rang thei ang bera hnûk lêt nghal turin kan phût," a ti a; sorkar hnathawk hlawh pûk chu eng atana hman tur nge tih leh engtika rulh tur nge tih puangzar tura sorkar an phût thu a sawi.

MPCC Media Chairman sawi danin, sorkar laipui aṭangin Mizoram sorkarin sum a hmuh tur ang ang ṭha takin a hmu reng a, state sorkar pawhin tax leh non-tax revenue aṭangin sum a la lut reng. Covid-19 dona atan bik cheng vbc. 55.77 a hmu tawh. Quarantine centre hrang hrang a ruak ṭan a, state páwn aṭanga haw tur pawh an tam tawh lo. ZMC pawhin buaipui tham damlo leh sample endik tur an nei tawh meuh lo tih Health Minister-in a sawi. Chutiang a nih avang chuan Covid-19 vanga sorkar sum senso tur chu tam tak a ni thei tawh lo. Chuvangin, sorkar hnathawk hlawh pûksak a ṭulna a awm loah an ngai a ni.

Dr Lallianchhunga chuan, May 7, 2020-a Assembly Speaker hoa political party hrang hrang MLA aiawhte'n meeting an neihah Cong­ress MLA-te an kal loh avang­in MLA fund leh hlawh cut chung­chang chu an zalennaah an dahsak tih a sawi a, "Congress MLA-te'n Co­vid-19 dona atana an fund an hman danah party dang MLA-te'n sawi­sel theih an nei lo," a ti. Hachhek bialtu MLA Lalrindika Ralte hmingin Finance Commissioner, UDPA Director leh RD Director hnenah information dil a nih thu sawiin Lallianchhunga chuan, "Information hi an pe chhuak duh lo a, RTI Act hmanga dil turin an ti a ni," a ti a; MNF sor­kar chu mipui thlan tlin MLA-te zah a, RTI Act hmang kher loa information an dil chuan pe chhuak phal tura an duh thu a sawi bawk.