Speaker/minister hlui Rokamlova vui a ni

Mizoram Legislative Assembly speaker leh minister hlui Rokam­lova (80) s/o KT Dawl­a, Dawrpui chu July 1, Nilaini zan dar 7:35 khan a thi a, nimin chawhma dar 11 khan Aizawl Central Presbytery Moderator-in a vui.

Rokamlova hi May 30, 1941-ah Aizawlah a piang a, December 16, 1976-ah Lianbuangi nen inneiin, fa pathum an nei. Zirna lamah - kum 1959-ah Mizo High School aṭangin matric a zo a, kum 1961-ah Union Christian College (UCC),

Meghalaya aṭangin intermediate of arts (IA) a zo. Kum 1963-ah St. Edmund’s College, Shillong aṭangin BA a zawh hnu­ah kum 1965-ah Guwahati University aṭangin MA a zo leh a; March 2009 khan Trinity College & Seminary, Churachandpur, Mani­pur-in Doctor of Divinity an hlân.

MA a zawh hnuah Shillong leh Mizoramah hna hrang hrang a thawk a, Pachhunga Memorial College (tuna PUC)-ah vice principal a nih bakah, kum 1978-1981 chhung Aizawl College-ah principal a ni a, kum 1981-1983 chhung khan NEHU, Mizoram Campus-ah deputy registrar a ni bawk. Kum 1984 velah politics-ah lûtin, Cong­ress party a zawm a, June 30, 1986 zana India sorkar leh MNF-te'n inremna thuthlung an ziahnaah a tel. Kum 1984-a Mizoram union territory-a MLA inthlanah Aizawl East bial aṭangin thlan tlin a ni a, Lal Thanhawla kaihhruai sorkarah minister niin, Education leh Social Welfare a enkawl.

Kum 1987-a Mizo­ram state Assembly inthlanpuiah Aizawl East-II bial aṭangin a tling leh a, mahse, opposition MLA a ni. Kum 1989 Assembly inthlanah a bial ngaiah tling lehin, minister a ni leh a, Rural Deve­lopment leh Transport department-te a enkawl a; kum 1990-1993 chhung Assembly speaker a ni leh bawk. Rokamlova hi kum 1993-a Assembly inthlan­ah Aizawl East-II bialah Congress ticket-in ding leh a, mahse, a tling lo a; kum 1999-a Lok Sabha inthlanah Congress party leh pawl dang ṭhenkhat thlàwpin candidate independent a ni a, a tling lo. Hemi hnu hian politics a chawlhsan zui a ni.

Kohhran leh kohhran ṭhalaia nasa taka inhmang a ni a, Dawrpui Branch KṬP-ah kum 1967-77 (kum 10) chhung leader a nih bakah, bial KṬP-ah hruaitu hlun a ni a, Central KṬP-ah kum ruk (1971-77) chhung office bearer a ni bawk.

October 1970-ah Dawrpui Kohhran upa atan thlan a ni a, he in­thlanah hian vote 100% a hmu. Dawrpui Bialah ṭum hnih chairman a ni a, Presbytery-ah mo­derator a nih tawh bakah, Synod hnuaia committee hrang hrangah a tel ṭhin. May 6, 1972-a Zoram Evangelical Fellowship (ZEF) din a nihin hruaitute zingah a tel a, a hnuah chairman a ni. Rokamlova hian kum 2015 aṭangin insawi­selna a nei ṭan a, kumin May 12 khan Ebenezer Medical Centre-a dah luh a ni a, May 16 tlai aṭangin nikhawhreloin a awm ṭan a, July 1 zan dar 7:35-ah a thi ta a ni.