Khawvela Zo hnahthlakte enkawltu tur Minister ZPM-in dah an tum

Ṭangrual pawl, Zoram Peoples' Movement (ZPM) chief ministerial candi­date Lalduhoma chuan, ZPM-in sorkarna an chan chuan khawvel hmun hrang hranga Zo hnahthlakte enkawltu tur bik minister an dah dawn thu a sawi. Kumin inthlanpuiah Assembly bial tinah candidate dah theih mah se, bial tinah candidate an dah dawn loh thu a sawi bawk.

ZPM CM Candidate hian nimin khan a pisaah thuthar thehdarhtute kâwmin, tun hnaia Myanmar rama a kal chanchin a sawi a; khawvel hmun hrang hranga Zo hnahthlak mi nuai 30-40 inkar vel awmte inpumkhatna leh inlungrualna an ngaih pawimawh thu sawiin, "Kan sorkar chuan khawvel hmun hrang hranga Zo hnahthlakte enkawltu tur bik minister kan siam dawn a ni," a ti.

Lalduhoma chuan, chief minister Lal Thanhawla Tahan-a a kal ṭumin Zo hnah­thlakte rorelna pakhat hnuaia awm leh independence chungchang a sawi tih sawiin, "A pawi khawp mai a, a sawina hmun tur a ni lo. Kha a thusawi vang khan Myanmar sorkarin Chin (Zo hnahthlakte) a rinhlelh phah a ni," a ti a; 'Kan chêp phah a ni,' tia an lo hrilh thu a sawi.

MNF president Zoramthanga Tahan leh a chhehvela kal pawh, MNF sorkar laia Myanmar mi hnawhchhuah vak chungchang an lo zawt tih sawiin Lalduhoma chuan, "Pu Zorama han kal pawh khan an rilru a han tihnual bawk a, a pawi hle a ni," a ti.

Lalduhoma chuan, "Khawvel puma Zo hnahthlakte inpumkhatna ngaihtuah pha lo hian politics hi an khel ve tawh turah ka ngai lo. Khawvelah Zo hnahthlak mi nuai 30-40 vel kan awm a, kan inpumkhata kan inlungrual hi kan hnam himna leh hmasawnna tur a ni," a ti a; Myanmar-a Mizote chu an sorkar lakah rinawm taka awm tur te, sorkar leh sorkar hnaah tam zawk luh tum turtein a chah tih a sawi.

Mizoram Assembly inthlanpuia ZPM-in candidate an dah dan tur zawhna chhangin ZPM CM Candidate chuan, bial tinah candidate dah thei mahse an dah vek dawn loh thu a sawi a, "NGO Coordination Committee-in candidate siam lo tura min ngenna area-ah candidate kan nei dawn lo a, an ngenna hi a zahawm kan ti. Foreigner tamna hmun a awm a, foreigner an la tam chhung chuan candidate dah kan tum lo a, unit pawh din kan tum lo," a ti.

Zawhna dang chhangin Lalduhoma chuan, symbol pakhat hnuaiah Mizoram inthlanpui an chuh dawn tih a sawi a, "Symbol pakhat hnuaiah inthlan kan hmachhawn dawn a, symbol tur erawh kan la thlang lo mai chauh a ni. CM tur leh symbol tura buaina a awm lo," a ti a; bial vil tur pawh bial pahnih/khat tih lohah chuan a chiang thawkhat tawh a, chutih rualin, bial vawngtute chu an ding ngei ang tihna erawh a ni lo tih a sawi.

ZPM kal zel dan tur chungchanga zawh­na chhangin Duhoma chuan, "Tun ṭum inthlanpui thleng chu movement anga kal phawt kan ti a; a hnu zelah pawh tumah kal hrang turah kan inngai tawh lo," a ti. Inthlana an dinhmun tur chungchangah, "Silent majority kan tih mai, neutral-te'n kan lam an hawi niin kan hria," a ti bawk.

Assam sorkarin National Register of Citizens (NRC) final list a tihchhuah tak chungchangah Lalduhoma chuan Mizoram sorkar chu muhil derah a puh a, "Kan ramri hmun hrang hrangah sorkarin duty khauh taka a dah a hun tawh. Sorkarin a ngaihsak si lo hi hnam pawisawina a tlingin ka hria. Kan ramrire hi ven ngun a ngai a, tih tak taka sorkarin thil a ti lo ṭhin hi a pawi a ni," a ti.

NRC-a chuang lo zinga tuna Assam-a MP pahnih leh MLA pali an tel tih sawiin Duhoma chuan, "NRC-a tel lote hian an chhehvelah luh rûk an tum dawn tih a chiang. Manipur leh Nagaland-ah chuan sorkarin ramrî-ah duty an dah tawh a, Meghalaya-ah pawh Khasi Students Union-te'n gate an siam tawh. Keini chiah hi la che lo kan ni," a ti a; hnam issue pawimawha Mizoram sorkar a che mai ngai lo leh a muhil der tlat ṭhin chu pawi an tih thu a sawi.

Lalduhoma chuan, hnam thil pawimawh, hnam himna chungchanga sorkarin hma a la chu a dem thu sawiin, "Kan sorkar hi eng nge a ṭangkaina? An tih tur an ti peih lo a ni. Hailakandi district-a chêng 98% chu Bangladesh aṭanga pêm lut an ni a, Assam state chhung hmun dang aṭanga tlanchhiate'n an belh ber tur chu Hailankandi a ni a, a dawt lehah Mizoram a ni," a ti.

Press conference-ah hian Lalduhoma hian tun hnaia Chin Unity Forum-in Tahan leh Yangon (Rangoon)-a seminar an buatsaiha paper a present dan te, Myanmar Parliament session a chhim dan te, Myanmar vice presi­dent Henry Van Thio nen an inkawmnaa an thil sawi dun hrang hrangte a sawi a ni.